كود هناء ابو علي طنجة ////

البارح الاثنين 20 اكتوبر 2025 بقاعة قصر الثقافة والفنون بطنجة بطنجة مع الثمنية الليل تقريبا تعرض فيلم “اوتيستو” للمخرج المغربي جيروم كوهين اوليڤار وانتاج زهور الفاسي الفهري. الفيلم داخل فالمسابقة الرسمية لهاد الدورة. الموضوع صعيب وتناولو ابداعيا لا مسرح لا سينما ناذر. يتعلق الامر ب”التوحد”.

غير تسمع فيلم على التوحد ومصايبو مغربي غادي تتساءل. كيفاش غادي يدير ليه. كانين عائلات كتعاني مع ولادها المصابين بالتوحد والظروف والعقلية كتخليهم كيوعاوش اصلا بهاد المرض.

المخرج بدا من منطلق واضح خلاه يتحكم فالموضوع وما يهربش من يديه. تجربتو الشخصية مع ولدو المصاب بالتوحد. طبعا زيد عليها معرفتو المسبقة باللي غادي يديرو سينمائيا عطانا فيلم زوين عامر بالاحاسيس. شاعري تفادى السطحية. المخرج نطالق من شخصية نسائية جسدتها الممثلة لبنى ابيدار. لعبات دور مليكة ام الطفل ادم اللي كيعاني توحد حاد. جسد دور ادم يوسف بوقرد الزينة.

اختيار لمرا طبيعي حقاش هي اللي كتعاني فالاسرة من امراض مماثلة. مليكة ضايعة فالمجتمع بحالها بحال ادم. مضاربة مع الزمان ومضاربة مع المجتمع ومضاربة مع مرض ولدها. ابيدار لعبات دور بقفوزية. كتحس بالخدمة اللي دارها المخرج فادارة الممثل. خرج منها المشاعر والاحاسيس اللي كيطلبها كل مشهد. ابيدار كانت مزيانة فهاد الفيلم. رجعات بدور صعيب ومركب.

المخرج فادارة الممثلين كان مزيان. شفنا الكبير عبد الله شاكيري. كي عادتو كيدخل فالدور كيتقمص الشخصية كيتجنب ديك الطريقة اللي كيديروها بعض الممثلين بحال الغوت وتعواج الفم …. حرايفي بصاح. لعب دور مول البار اللي خدامة فيه مليكة وفنفس الوقت متبم بيها.

حتى الممثل اسماعيل القناطر اللي لعب دور محمود صديق ادم وهو اللي طلق عليه “اوتيستو” دار من احسن ادوارو فالسينما. كتحس بيه كيشبه كطريقة الراحل محمد مجد فالتمثيل

الفيلم عكس شخصية المخرج. فيه حياء. حشومي. فيلم حتى الشخصيات العنيفة بحال اللي جسدها شكيري عندها وجه انساني رقيق. شاعر عاشق للشراب ولمليكة.
الفيلم كان فيه شوية التمطيط. كان يقدر يكون اقصر بكثير من 103 دقيقة، ولكن قدر يلصق الجمهور فالكرسي البارح وما يخرج حتى تطلع الكتبة. بموضوع معقد بزاف قدر جيروم كوهين اوليڤار يهز النيفو فالمهرجان الوطني للفيلم. كاين شي خردة معروضة فهاد المهرجان دفعك بعض المرات تكره الانتاج الوطني فالفن السابع