كود – كازا //

توصلات “كود” بعمل روائي جديد للصحفي عبد الرحمن عبد الوالي بعنوان “جيرميبلادن”، واللي كيسلط الضو على الذاكرة ديال واحد الفيلاج  منجمي فالمغرب.

الرواية كتختار صوت طفل عاش وسط أجواء المناجم، قبل ما يرجع لنفس البلاصة من بعد خمسين عام على سدانها، فين كيلقى تحولات كبيرة خلات الفضاء اللي عرفو فالصغر يتحول لأطلال كتقاوم النسيان.

النص كيغطس فالتفاصيل اليومية ديال حياة العمال وسط المناجم، وكيعطي صورة دقيقة على ظروف الخدمة القاصحة، ونقص الأجور، والتفاوتات الاجتماعية اللي كانت حاضرة بقوة. كما كيهضر على تطور الوعي الاجتماعي وسط الساكنة، من خلال  العمل النقابي وتنظيم الإضرابات والاحتجاجات فمواجهة الشركات والسلطات.

الرواية كترصد حتى المسار ديال القرية، من مرحلة النشاط والحيوية الاقتصادية، حتى لمرحلة التراجع والانهيار من بعد الإغلاق المفاجئ للمناجم، واللي خلّى آثار اجتماعية قاصحة، بحال قلة الخدمة و السكان ولي تشردو.

الرواية كيتعاود القصة من الطفولة للشباب ديال البطل حتى للكبر، مع تفاصيل دقيقة كتقرّب القارئ من التجربة الإنسانية وسط هاد العالم ، وكتبين الرواية حتى التعايش بين مكونات اجتماعية وثقافية وسط الفيلاج وكيفاش كان هاد التنوع جزء من الحياة اليومية، وخا المشاكل  المرتبطة بالصراع الطبقي.

“جيرميبلادن” إضافة جديدة للمشهد الأدبي المغربي، خصوصا فمجال أدب المناجم، حيث كتمزج بين السرد الروائي والتوثيق الاجتماعي، وكتقترح قراءة عميقة لذاكرة جماعية وتجربة إنسانية.