هند لكلاوي كود مراكش ///

فمقال كولو صباغة وفيه لكذوب نشرات “جون افريك” فعددها الاخير ل25 نونبر بورتري لبنت الباشا فاطمة الزهرا المنصوري منسقة حزب الاصالة والمعاصرة ووزيرة السكنى. البورتري بعنوان “حتى لاين غادية تطلع المنصوري وزيرة السكنى”. فهاد البورتري اللي دارتو صحافية ماشي مغربية كتجهل السياسة فبلادنا٬ رجعات بنت الباشا “رئيسة الحكومة المقبلة گاع. نظريا البام ايلى ربح الانتخابات بنت الباشا عندها حظوظ لهاد المنصب. لكن حزب دگدگاتو هي وللي معاها صعيب عليه بزاف يطفرها فالانتخابات

لكن قبل هاد الشي اجيو تشوفو اش كتبو عليها. قالو عليها كلشي فاللول الا مهنتها كمحامية وماشي شي محامية معروفة گاع. هادا موضوع اخر. 

بنت الباشا عند مجلة اولاد البشير بن يحمد٬ “باطرونا” “كتسير الميديا” اييه كتبوها “الميديا” وزادو “امرأة اعمال” وزادو باللي جابها فؤاد عالي الهمة =للي دابا مستشار سيدنا= باش تتكلف بفرع “حركة لكل الديموقراطيين” فمراكش. هاد الحركة هي اللي فرشات باش يتزاد حزب الاصالة والمعاصرة.فهاد لكلام ديال المجلة الفرنسية٬ كاين شلى كذوب. المنصوري ماشي باطرونا. كتسير غير اللي ورثاتو على بوها الباشا. ما عندهاش مقاولات فالميديا. ايلى كانو يهدرو على شي بلاد اخرى. ممكن. من غير اعلام حزبها الفاشل وشركات كيتعاقد معاها خدمتها تسينيالي اللي كيكتب خايب عليها٬ ما عندها والو. هادوك شركات ديال شي وحدين كيخدمو مع وزير الاتصال اللي سميتو مهدي بنسعيد. 

دابا هاد الشي اللي كتبوه عليها ما تكتبش فمعطيات اللي تكتبات عليها نهار عينها سيدنا ف 7 من شهر أكتوبر 2021، ووزيرة إعداد التراب الوطني والتعمير والإسكان وسياسة المدينة. كان خرجات “لاماب” باللي قرات فالمدارس الفرنسية فمراكش. ما عندها علاقة بالتعليم ديال المدرسة المغربية. ما تجيش شي نهار تهدر على المدرسة العمومية. هي اصلا ما قراتش. خدات الباكالوريا من فيكتور هيگو بمراكش ف1994 ومشات للرباط خدات الاجازة فالقانون الخاص فجامعة محمد الخامس ثم دبلوم الدراسات المعمقة ” D E A ” قانون عقود الأعمال من جامعة مونبليي بفرانسا ودبلوم في قانون الأعمال الانجلوسكسومي جامعة نيويورك الولايات المتحدة الأمريكية. حتى فالمحاماة وهي مهنتها فبدات عضو فهيئة المحامين في مراكش منذ سنة 2005.

بنت الباشا كدافع على الفكر الفرنكفوني من خلال جمعية “مونية” لإنقاذ التراث وجمعية طلبة القانون الفرنسي.
هاد الشي ديال سيدة اعمال وباطرونا ف”الميديا” ووو ما شفناهاش حتى باش الدولة من خلال وكالة المغرب العربي للانباء بغات تقدمها للمغاربة. يعني جون افريك مطلعينها على اللي غادي يقراهم من لمغاربة وصافي.

المنصوري ما يمكنش تكون رئيسة حكومة وحزبها مشتت. ما يمكنش تكون رئيسة حكومة مقبلة وهي فاشلة تجمع فضايح الحزب. شفنا اش وقع مع صلاح ابو الغالي اللي كان واحد من 3 قيادات البام الحالي. معاها. هي مشات دعمات امبراطور الفروماج بن الضو حقاش عندو فلوس كثيرة وكيدعم الحزب ضدا فابو الغالي ودانتو قبل ما توصل القضية للقضاء. بنت الباشا اتهمها رئيس جماعة تازورت احمد الوهابي باللي جرات عليه من الحزب لانو وقف ضد زوجها نبيل بركة اللي بغى يستولي علي اراضي تماك كيف خرج وشرح هاد رئيس الجماعة.

فقضية منير مون بيبي عمدة طنجة٬ دعمات منسقة الحزب٬ هاد الشخص. القضاء كان دان مستشارو فديك القضية اللي هزات طنجة.

مدينة مراكش اللي هي عمدة ديالها فبلايص كثيرة مازالت موسخة وحشومة يكون هاد لوسخ فيها. مشاكل كثيرة فالسكنى والنقل. 
وزارتها ما قدراتش حتى طبق اللي خرج منو اجتماع ترأسو سيدنا باش يكون فكل جهة من الجهات 12 وكالة حضرية.

بنت الباشا كان ممكن تكون سياسية قافزة لو كتخدم لوقت طويل وكتبع كل التفاصيل. هاد الشي ما كاينش وناس الحزب والوزارة عارفين شحال كدوز من ساعة فالمكتب.
بنت الباشا وزيرة كثير عليها.