فاطنة لويزا كود —-

واش غتكون عندنا امرأة رئيسة وزراء؟

واش غيكون المغرب أول دولة عربية أمازيغية كتوصل فيها امرأة لرئاسة الحكومة عبر صناديق الاقتراع؟ باعتباري امرأة، مكرهتش.

واكثر من ذلك كنقول بلي بلادنا موفرة فيها كل الظروف باش تكون امرأة عللا رأس الحكومة، بما فيها وجود كفاءات نسائية قادرة تكون فديك الموقع.
يكفي أنه كانت عندنا مستشارة ملكية قوية، زليخة نصري الله يرحمها.

وعندنا نساء لي سيرو باقتدار مؤسسات دستورية مهمة من قيمة المجلس الأعلى للحسابات، والمجلس الأعلى للاتصال السمعي البصري، والمجلس الوطني لحقوق الإنسان.

لكن، واش الأسماء لي قدماتها جون أفريك كمرشحة للوصول إلى منصب رئاسة الحكومة بالفعل كتوفر فيها المواصفات المطلوبة؟

غنميكو على بعض الأسماء لي ما يمكنش تكون في رئاسة الحكومة بسبب أنها غير منتمية لأي حزب أصلا، في حين أن الدستور واضح في أن رئاسة الحكومة كيعين فيها الملك شخصية من الحزب الأول حسب نتائج الانتخابات المحلية.

وغنبقاو في الأسماء الحزبية: فاطمة الزهراء المنصوري، ونادية فتاح العلوي، ونبيلة منيب.

طبعا نبيلة منيب مستحيل تكون فرئاسة الحكومة، حيت مستحيل الحزب ديالها الاشتراكي الموحد يتصدر نتائج الانتخابات، عار الله إذا قدر يوصل واحد أو جوج في اللوائح المحلية، وشي واحدة في اللائحة الوطنية، حتى أنه يوصل لتشكيل غير مجموعة نيابية هو من سابع المستحيلات.

ولذلك فمنيب غتبقا ظاهرة صوتية كتمارس المعارضة وبمضمون شعبوي في أحسن الأحوال.

نادية فتاح العلوي، وزيرة المالية، كيتوفر فيها ما لا يتوفر في نبيلة منيب، أي الكفاءة التدبيرية، هاد السيدة بينات في مسارها سواء في القطاع الخاص مع مولاي حفيظ العلمي، أو في المسار الوزاري ديالها أنها ما ساهلاش في التدبير.

ولكن كتبقا مفتقدة للجانب ديال التسييس، واخا هي مستوزرة باسم التجمع الوطني للأحرار، وكنظن أن استقطابها للأحرار ما كانش لأسباب سياسية، بل لبروفايلها التكنوقراطي.

وحتى شخصيتها القوية في إطارها التدبيري مع ليكيب لي كيخدم معها، مكنلقاواش في وجهها السياسي، بدليل أن كاريزما فوزي لقجع غطا عليها، حتى على مستوى التفاوض والحوار مع المعارضة الحزبية والنقابية، لدرجة انه كاين لي كيسحابليه بلي هو وزير المالية والاقتصاد.

وفي كل الأحوال، فإنه إذا تصدر التجمع الوطني للأحرار مرة ثانية نتائج الانتخابات، فمكاينش أي مبرر للاستغناء على عزيز أخنوش، لا سياسيا، ولا تدبيريا، ولا في العلاقة مع القصر، ولا حزبيا. وبالتالي لا حظوظ لنادية فتاح العلوي في تولي منصب رئاسة الحكومة.

كتبقا بنت الباشاوات وسليلة القياد: فاطمة الزهراء المنصوري.

والحقيقة ان المقال المخدوم ديال جون أفريك كان الهدف ديالو هو الترويج لاسم فاطمة الزهراء المنصوري. اما الأسماء الأخرى غير داروها طريق وفقط.
من الناحية الدستورية، لا شيئ يمنع تعيين فاطمة الزهراء المنصوري رئيسة للحكومة إذا تصدر البام نتائج الانتخابات.

ولكن ماشي مؤكد حتى في حالة تصدر البام للانتخابات.

لأنه من جهة الدستور لا يفرض على الملك تعيين الأمين العام ديال الحزب المتصدر للانتخابات، بل فقط انه يكون من ديك الحزب.

ومن جهة أخرى ففاطمة الزهراء المنصوري هي جزء من القيادة الثلاثية ديالالبام، أي أنه حتى في حالة أن الملك قرر الإبقاء على عرف تعيين الأمين العام ديال الحزب المتصدر للانتخابات، فسيكون امام ثلاثة خيارات وليس خيار واحد.

دابا اجي نشوفو مؤهلات فاطمة الزهراء المنصوري التدبيرية والسياسية.
من الناحية التدبيرية ففاطمة الزهراء المنصوري معندهاش تجربة كبيرة في التدبير، وأول مسؤولية تدبيرية غتكون هي لي على رأسها هي عمودية مراكش، ووزارة الإسكان.

وفهاد زوج ديال المسؤولية مدارتش شي حاجة كثيرة.

في مراكش معروف ان النواب ديالها هوما لي كيسيرو المدينة، أما هي فآوت، بدليل أنه حتى أثناء زلزال الحوز ولي مس حتى مراكش كان الحضور ديالها ضعيف جدا، لا على المستوى التواصلي ولا على مستوى حجم التدخل.

أما في وزارة الإسكان، فشخصيا واخا مهتمة بالنساء والعمل السياسي، كنسى شحال من مرة أنها وزيرة.

قليلة الحضور في البرلمان، وغالبا كيجاوب في بلاصتها شي وزير في إطار ديك اللعيبة ديال التضامن الحكومي أثناء الجلسة العامة البرلمانية.

ويكفي أننا نتذكرو مرور وزراء بحال اليازغي ونبيل بنعبد الله ونزار بركة، ونقارنو حضورهم بحضورها باش يبان الفرق.

هادشي كنقولو أنا لي مرا، ولي كنآمن بلي كاين نساء قادرات على تسيير وزارات كبرى بما فيها حتى وزارة الداخلية لي صعيبة.

أما من الناحية الحزبية، فالمعروف أن فاطمة الزهراء المنصوري ماشي شي وحدة لي تدرجت فالعمل الحزبي، هي واحدة لي نزلات فجأة بالباراشوت، في موسم الهجرة نحو البام واحد الوقت.

مادوزات شبيبة حزبية، ما دوزات حركة طلابية، ما دوزات عمل حقوقي أو نقابي أو جمعوي.

حتى على مستوى المحاماة، لم تكن محامية معروفة، وما عمرها كانت في تنظيم ديال المحامين لا جهوي ولا وطني، ولا في شي جمعية هيآت المحامين.

ولولا أن بعض الأسماء النسائية في البام رجعت لأسباب معينة للور بحال فتيحة العيادي مثلا، لما كان تم الدفع دفعا بفاطمة الزهراء المنصوري للواجهة.
يكفي أنها وهي في القيادة الثلاثية ديال البام، معمرها قدرات دير ندوة صحافية بوحدها، ولقات هاد التخريجة ديال القيادة الثلاثية مسلكاها، بحيث في كل ندوة صحافية ديال الحزب كتجيب معها فريق في المنصة باش يجاوب على أسئلة الصحافيين.

ثلاثة ديال القيادة الثلاثية، ورئيسة المجلس الوطني، ورئيسا الفريقين البرلمانيين، وكودار رئيس قطب التنظيم في الحزب.

وفي الإجابات كتكون هي أقل واحد كيجاوب، بحيث كنسمعو صوت المهدي بنسعيد وسمير كودار وأحمد التويزي أكثر مما كنسمعو صوتها.

وكتحول ديك الندوات الصحافية إلى تشويه حضور المرأة في العمل الحزبي، بحيث كتبان فاطمة الزهراء المنصوري ونجوى كوكوس بحال شي ديكور أمام استئثار الرجال بالكلمة، واخا كتظل فاطمة الرهراء المنصوري تتظاهر بالقوة، وزعما هي المرأة الحديدية والمتحكمة في الحزب.

أكثر من ذلك، السيدة كتظل تسافر برا المغرب، سواء لأغراض خاصة او في مهام حزبية أو وزارية ظاهريا، ولكن معمرنا شوفناها فشي محادثات مع سياسيين وقيادات حزبية على برا، ولا شي لقاءات ديالها مع مغاربة العالم.

بمعنى أن فاطمة الرهراء المنصوري لي لقات الطريق مفروشة، ولي ممكن نقولو انها اكثر النساء حظا في السياسة، معرفتاش كيفاش تستغل هاد الفرص في تطوير إمكانياتها السياسية.

وهادي مناسبة باش نقولو شابو للنساء لي كبرو فوسط الأحزاب، وقطعومسارات صعيبة باش يفرضو تفسهوم في واحد الضومين لي كان ذكوري بامتياز
وهنا غنرجعو ماشي لجون أفريك، ولكن لهاداك أو هاديك لي ورا مقال جون أفريك، ولي غالبا غيكون شي مغربي فشي بوسط معين، غالبا في الصحافة أو ما جاورها، ولي بغا يقدم خدمة لفاطمة الزهراء المنصوري، ومغنتهموهشبلي خدمة مدفوعة الأجر.

ولكن غنقوقو بلي مشا ديك الزمان لي المغاربة إذا لقا وشي مقال فشي منبر فرنسي غيقولو بلي هاد المقال وراه جهات عليا.

الجهات العليا فهاد البلاد كتدوي مع المواطنين مباشرة، وماشي بإشارات فجون أفريك ولا باري ماتش ولا لوفيگارو.