كود -وكالات//

كولشي حاط عينو مرة اخرى فالعاصمة الباكستانية إسلام آباد، بعدما قربات تبدا جولة ثانية من المفاوضات المباشرة بين مريكان وإيران، فسباق مع الوقت قبل ما يسالي وقف إطلاق النار نهار 21 أبريل.

فالجولة اللولة، گلسو وفود كبار نهار السبت، وبقاو كيتفاوضو 21 ساعة بلا ما يوصلو حتى لشي اتفاق، الوفد الإيراني ترأسو محمد باقر قاليباف ومعاه عباس عراقجي وعلي أكبر أحمديان، أما الوفد الأمريكي فترأسو كام جيه دي فانس ومعاه جاريد كوشنر وستيف ويتكوف.

الخلافات الرئيسية باقية هي نيت ديال فتح مضيق هرمز بلا ديوانة واشنو هو مصير المخزون ديال اليورانيوم المخصب، والمطلب ديال طهران لي كتطالب تفك السيزي على 27 مليار دولار ديال الفلوس ديالها.

فالمقابل، واشنطن باغية تحبس إيران من التخصيب بشكل نهائي، واقترحات حتى وقف مؤقت لمدة 20 عام.

من جهتهم الإيرانيين كيتهمو مريكان بالتيار عليهم وتبديل الشروط فآخر لحظة، وكيقولو أنهم كانوا قراب يتفاهمو، وخا هكاك كاين أمل فالجولة الثانية اللي ممكن تبدا قريب، دونالد ترامب قال بلي كاينة “أخبار زوينة” جاية، وزاد أكد أن باكستان كدير دور مهم باش تقرب بين الطرفين.