كود الرباط//
هاد الأسبوع، عرف مجلس النواب، اجتماعات ماراثونية امتدت لساعات طوال دون انقطاع، سواء ف اللجنة أو خلال الجلسة العامة أثناء المناقشة والمصادقة على الجزء الأول من مشروع قانون المالية 2025.
الملاحظ، حسب متتبعين للشأن المالي والسياسي، هو أن الحضور القوي فهاد المناقشة كان لفوزي لقجع، الوزير المنتدب المكلف بالميزانية، ضابط الضرائب وعارف كل تعديل بالتفصيل وكيجاوب سياسيا وقانونيا وحتى ضريبيا على المعارضة، كان جوكير حقيقي فهاد الكومبا ديال الميزانية.
بين لبارح واليوم، كثر من 10 ساعات فجلسة عمومية تم بثها على اليوتيب، ظل لقجع صامدا فوجه مبررات التعديلات لي تقدمت بها المعارضة ودافع بشراسة على توجهات وتعديلات الأغلبية.
لقجع فلحظة الغضب كيحيح ومكيسكتش فالمقابل كيدير توازن سياسي بين الأغلبية والمعارضة، لذلك فرق الأغلبية والمعارضة قليل فاش كيهاجموه، وفي نفس الوقت مكيخليش البوليميك ديال البي جي دي ونبيلة منيب يدوز، كيحيح ويرد بقوة سياسية وبطريقتو المعهودة. قاعدي فالرد.
فالوقت لي لقجع بان “جوكير” الحكومة فتدبير ومناقشة الميزانية، فتاح علوي وزيرة الاقتصاد والمالية لي المسؤولة الأولى على الميزانية سياسيا، لي خصها دافع وتكفض على ذراعها، بانت ضعيفة وحضورها قليل. تكتفي بقراءة الأوراق والكلمات لي كيكتبو ليها الفريق ديالها.
الوزيرة فتاح علوي، واخا كفاءة، معندهاش خطة تواصلية، ومدارتش ندوة صحافية هاد العام حول مشروع قانون المالية، فسابقة من نوعها وعمرها دارت، وهادشي يؤكد بلي المكلفين بالتواصل ولا الشركة لي ضاربة فلوس هاد المارشي مدايراش خدمتها. فلوس كادخل وتواصل فاشل.
