كود – سبتة//

وأخيرا نشر جورنال صبليوني التصاور ديال عدد من الحراگة اللي غابرين من نهار بغاو يدوزو لسبتة، هاد الخطوة ممكن تعاون العائلات اللي مازال ما عارفاش المصير ديال ولادها.

نشر تصاور ديال هاد ناس كيجي فوسط عملية  للتعرف على الجثث اللي تجبدات من البحر، خصوصاً أن عدد من العائلات المغربية مازال كتقلب على ولادها اللي مقدراتش تعيط لهم منهار  حرگو.

منذ داك الوقت، ولات مواقع التواصل الاجتماعي بلاصة ديال تقلاب ،عائلات كتشارك تصاور ديال ولادها، وكتكتب سمياتهم والعمر واشنو كانو لابسين اخر مرة، ياكما شي حد يتعرف عليهم أو يعطي معلومة على فين شافهم آخر مرة.

فالمقابل، خدامة فرق الطب الشرعي والحرس المدني فسبتة عملية على تحديد هوية الجثث، وكيتم الاعتماد على البصمات، وتحاليل الـDNA، و المعطيات اللي كتقدمها العائلات.

حتى التفاصيل الصغيرة، بحال وشمة، صربة، لباس أو خاتم، ممكن تعاون فالتعرف على الجثث.

وحسب المعطيات والصورة اللي نشرتها ”ال موندو“ تعرفات هوية 4 الضحايا، و مزال DNA كيتقارن مع 28 جثة اخرى بفضل العينات الوراثية اللي قدماتها العائلات.

وحسب  منظمة «كاميناندو فرونتيراس»  عدد الوفيات وصلو 145 واحد فحين السلطات المغربية كتقول بلي سجلات 11 الوفاة، اما السلطات الإسبانية فكتقول بلي كاين 100 ضحية.