كود – وكالات//

صنّفات السلطات البريطانية هجوم الطعن اللي وقع صباح اليوم لاربعا فحي غولدرز غرين فشمال لندن على أنه عمل إرهابي، من بعد ما ضربو جوج ديال الرجال يهود، واحد عندو 76 عام والآخر 34 عام، والحالة ديالهم مستقرة فالسبيطار، لقطات من كاميرات المراقبة بيّنات واحد من الضحايا واقف حدا الموقف ديال الطوبيس حتى هجم عليه واحد ودفعو وضربو بالموس.

https://x.com/i/status/2049467877107888416

المشتبه فيه راجل عندو 45 عام، تشد بعدما البوليس ضربوه بالضو حيث كان كيحاول يهاجم حتى على عناصر الأمن، وتدار ليه الاعتقال بتهمة الشروع فالقتل.

مفوض الشرطة مارك رولي وصف اللي وقع بأنه “هجوم على اليهود البريطانيين”، وحذّر من الارتفاع فحالات العنصرية ومعاداة السامية، وأكد بلّي المشاكل الدولية ما خاصهاش تتحوّل لسبّة للعنف.

من جهة أخرى، تنظيم كيسمّي راسو “حركة أصحاب اليمين الإسلامية” (HAYI)، واللي كيتقال عليه مرتبط بإيران، علن تبنّيه الهجوم ففيديو تنشر فقنوات قريبة من النظام الإيراني، هاد التنظيم سبق ليه تبنّى هجمات أخرى على أهداف يهودية ومعارضين لإيران فلندن مارس اللي فات.

وزيرة الداخلية البريطانية وضّحات بلّي حتى لدابا ما كاين حتى دليل كيربط المشتبه فيه بشي جهة خارجية، ومن جهتها وزارة الخارجية الإسرائيلية طلبات من بريطانيا تحمي جاليتها لحقاش كتشوف بلي الأمور خرجات على السيطرة.