كود الرباط//

بلا صفقات ولا ضياع للمال العام، جوج وزراء ف الاحرار طلعو النيفو فهاد الدخول السياسي، من خلال اجراءات صارمة خداوها. طبعا بالاضافة إلى وزير الفلاحة لي تحرك بزاف فهاد الدخول السياسي من خلال عملية الاحصاء للقطيع والاجراءات الجديد لي خدا.

هاد جوج وزراء هوما وزير التربية الوطنية سعد برادة، ووزير الصحة امين التهراوي، بجوجهم بداو بعملية بونظيف لهاد جوج قطاعات الحساسة، من خلال تكثيف عملية المراقبة أو من خلال حكامة الصفقات وتشديد شروطها ومراجعتها.

وزير التربية الوطنية، كلف لجن باش يزورو عدد من المدارس ويوقفو على الدخول المدرسي ويشوفو شنو طاري فهاد المؤسسة العمومية، شفنا استنفار فمدارس الدولة، بالاضافة الى النجاح المستمر لمدارس الريادة.

أما وزير الصحة، واخا كان ضاربها بـ”سكتة” منذ تعيينه، بان بلي خدام ف صمت، موجد خطة، ودار دراسة شاملة للقطاع، عرف فين كاين الخلل.

عكس ما يتم ترويجه من غياب الموارد البشرية، حسب مصدر مقرب من “الوزير” فراه الموارد البشرية موجودة ومكاين خصاص لا ف الأطباء ولا الممرضين ولا الأطر التقنية، وبلي كاين هو سوء التوزيع والتدبير.

فهاد السياق الوزير التهراوي، داز للفعل أي للمراقبة وللي حصل يودي، بحيث طلق أكبر حملة تفتيشية للسبيطارات، لحد الساعة لقا الفضايح وهروب الاطباء من العمل فالمستشفى العمومي.

بالمقابل، هاد جوج وزراء، بانت وزيرة السياحة ضعيفة قدامهم، عاطياها للمارشيات، عندها مؤسسات مكاديرش خدمتها بحال مكتب الهندسة السياحية، غير الغرق والمشاكل سواء ف برنامج فرصة، ولا الصداع لي نايض على صفقة الزبون السري. كان بامكان يدارو لجن تفتيشية بأطر مغربية بلا صفقة ولا والو. وثانيا راه اصلا هادي مهام المفتشية لي تابعا للوزارة، ويلا كانت هاد المفتشية مقاداش راه فضيحة.