سهام البارودي- كود//

العلاقة بين المرا و الراجل مدّة طويلة و هي كاتبنى على “الحاجة” و هادشي فگاع المجتمعات و لكن بزاف ديال المجتمعات حن عليها الله و طوّرات، حنا للأسف مازال عندنا العيالات كايتجوجو باش يلقاو لي يصرف عليهم و الرجال كايشدوهم من هاد النقطة بالضبط باش يحگرو عليهم و نهار كاتشكّى المرا كايجي المجتمع يقوليها ” مالك آش خاصك، ياك واكلة شاربة ؟” حيت جيسطومون، بالنسبة للمجتمع مادام الراجل موكلك و مشربك راه واخا يعفط عليك بسبّاطو هانية، يضربك الله يسامح، يسبّك اللسان مافيه عظم، يخونك “تانتي يدور يدور و يرجع لدارو” … مهم لي دارها الراجل جات معاه و كيفما كان قبلي عليه و بغيه و صبري معاه ! كان مزلوط كان خايب كان معفون كان ماكايقيّمش كان مريض نفسي … الجواب كايبقى هوا ” مالك آش خاصك ياك واكلة شاربة ؟”

و هاد القضية سلكّات الرجال مدة طويلة حيت ماكانش مطلوب منهم شي مجهود كبير باش تبقى معاه المرا و تصبر ليه و لطاسيلتو ! ميكة ديال الخضرة مخلطة و رابعة ديال الدجاج ضامنة الاستقرار الزوجي و المرا سادّة دلقوشها مادام الكوكوط كاتصفّر فالكوزينة.

ولكن هادشي كايتبدل مع الوقت و خصوصا فاش المرا ولات عندها استقلالية مادية وولات قادّة تجيب ميكتها د الخضرة و تخلي كوكوطها تصفّر بوحدها، ولات تقدر طلب الطلاق و تجري على الراجل لاماعجبهاش.

هاد القدرة ديال انه المرا تقلب الطبلة و تقول للراجل سير فحالك هي لي مشكلة عقدة لبزّاف ديال الرجال اليوم و عليها نايض هاد الصداع كامل ديال لا تتزوج بموظفة و المرا تقرا و لكن حدها السادس و منها نيت جا داك التصريح ديال بنكيران فاش قال ” واش كاينة شي مرا غاتبقى معاك حتى تموت باش تورث الثمن و هي عارفة لاطلقات منك غادّي النص؟”

عارفين بلي مافيديهمش ! عارفين بلي الحاجة الوحيدة لي كاتجمعهم بالمرا هي الكوكوط، ماكاين لا حب لا احترام لا عشرة لا مودة لا رحمة، عارفين في قرارة نفسهم انه ماعندهم مايعطيو للمرا لا نفسيا لا ماديا لا جنسيا اللهم يشدوها بزز بالمصروف ( و شي مصروف نيت ماكاين).

السؤال ديال بنكيران سطحي فحال العقول ديال الناس لي حالين فمهم فيه و كايصفقوا ليه بحرارة، بنادم بموسطاشو مقتانع بلي خاصو يشد المرا من يديها لي كاتوجعها باش تجلس معاه و تبقى معاه حياتها كاملة، رجال بلحاياهم يعمرو المخاد ، و راضيين بمسألة انه مراتو معاه غا حيت ماعندهاش الاختيار نهار يكون عندها الاختيار غاتكركبو.