سهام البارودي-كود//

بزاف ديال المغاربة كايعطيو قيمة كبيرة للعيد الكبير و للحولي ديال العيد الكبير، و خصوصا خصوصا المزاليط ! هادوك كايصحابهم الحياة كاملة كادّور على الحولي ! من كايخرج رمضان و هوما هازّين الهم للحولي و خاصهم حولي كبير و گرونو كبار و سمين و صردي و و و و ! من كايخرج رمضان و هوما كايشكيو و كولا عام طبعا نفس السينتا ” هادشي غالي بزاف واش الدرويش مايعيدش ؟”
اه مايعيّدش

الدرويش راه ماخاصوش يعيّد ! ماخاصوش يطحن راسو و يسعى و يبكي و يتعلق فين يتفلق باش يشري الحولي ! الدرويش عندو اولويات اهم من الحولي، من الاحسن يتكونصونطرا عليهم ( الكرا و الما و الضو و القراية و الكسوة د الدراري) دوك الدراري لي كايبغي يفرّحهم بالحولي ! الدراري كايفرحو بشي دار زوينة متيسعة كل واحد عندو بيتو، و كايفرحو بشي مدرسة مزيانة ، و كايفرحو بوسائل الراحة و الاستمتاع تكون عندهم فالدار فحال البلاي و الايكس بوكس، و شي ماكلة مزيانة و لباس مزيان يخرجو بيه و شي تربية مزيانة و تعامل مزيان من الواليدين ! هادشي لي كايفرَح الدراري ماشي نتا ولدك لابس صندالة د ميكة مقطّعة و كاينعس فوق لحاف خانز بالبول و باغي تفرحو بحولي ! بقا لمّك غا الحولي ! الحولي كايشريه لي عندو المادّة ، لاباس عليه، مامحتاجش، ماغاديش يخلي مول الكرا بلا خلاص باش يشري الحولي و يشوي بولفاف ! واخا غالبا دابا لي عندهم بزاف منهم كايختارو يسافرو فالعيد الكبير و يرتاحو فمراكش و لا طنجة فشي اوطيل ! و كايخليو الفوقارا يتقاتلو على شكون عندو حولي اكبر من شكون و شكون دوارتو اكبر من لاخر ؟! و نتا بشحال شريتي ؟! و نتوما شكون شرا ليكم ؟! واش صردي ؟ لا هادو ديال خنيفرة ! لا ديال تمحضيت احسن ! و دوك الحوارات الفارغة من اي معنى ! سبعين الف عام و نفس الحوارات و نفس الهضرة و نفس الشكاوي كايتعاودو لاجديد تحت الشمس!
هادشي علاش ردّا على السؤال ديال واش الدرويش مايعيًدش ! كانقول اه مايعيّدش !
بكل بساطة!