كود أكادير //

الهضرة هاد الايام فسوس خاصة أكادير على رئيس الجهة كريم اشنغلي لي قريب يرجع للحزب ديالو القديم البام.

اشنغلي لي كان قيادي فالبام قبل مايلتاحق بالأحرار ف انتخابات 2021، قالت مصادر “كود” أنه تلاقى مع وهبي وقريب يرجع للتراكتور واخا هو حاليا رئيس مجلس جهة سوس تحت قبعة الأحرار. نفس المعطيات تناقلتها مواقع محلية.

اشنغلي لي عندو علاقة تجارية مع رجال أعمال فالبام حيث هو شريك واحد من رجال الأعمال فحزب البام المعروفين فأكادير وولد اشتوكة أيت باها وغالبا غادي يرجع يترشح لشي منصب باسم التراكتور.

ماشي غير مشكل فرئاسة الجهة والتحالفات اللي مرونة، حتى مسؤول التواصل فالجهة، مصادر “گود” واش باقي معلم ولا صحافي ولا موظف ولا عضو ف هيئة مهنية ديال الناشرين لي معندوش الحق يكون فيها لأنه موظف مع الجهة.

قمة العبث كايعيشها مجلس جهة سوس ماسة خلال رئاسة اشنغلي ، حيث هاد الأخير خلا موظف يدير لي بغا فالإعلام ويفرق الإشهارات على صحابو ، وفق مصادر مهنية بجهة سوس.

هاد الموظف كان فالتعليم والتحق بالجهة قبل نهاية ولاية ابراهيم حافيدي ولكن الغريب أن هاد الشخص ماعرفناه معلم ولا صحافي ولا موظف فالجهة حيث عندو موقع إلكتروني خدام بيه في أكادير ومستافد بيه، وبيه دخل لفيدرالية الناشرين لأنه فالمكتب ديالو. تقول مصادر “گود”.

حتى فالتواصل كاين الغباء، كيفرقو رسائل التهنئة والتعازي بالإشهار على مواقع محلية وللي كيتشغلو فيها صحافيين وهميين معندهمش بطاقة المجلس الوطني للصحافة.