كود بني ملال//

جهة بني ملال غادي تشوف هاد العام ثلاثة مشاريع كبار فالميدان الصحي داخلة فقانون المالية ديال 2026، مجموع تكلفتهم كتوصل لـ366 مليار سنتيم، وبطاقة استيعابية ديال 1220 سرير، اللي غادي تحسن بزاف من الخدمات الصحية فالجهة.

أول مشروع هو المركز الاستشفائي الجامعي فبني ملال، اللي الأشغال فيه بداو فعلاً، بتكلفة 240 مليار سنتيم وسعة 520 سرير. فـ قانون المالية ديال 2026، تم تخصيص 16 مليار سنتيم باش يكملو هاد المشروع ويستافدو منه المواطنين فالأقرب وقت.

وفنفس الوقت، الأشغال ديال المركز الاستشفائي الجهوي فبني ملال مازال مستمرة بنسبة إنجاز تقريباً 45%، بتكلفة 80 مليار سنتيم وسعة 450 سرير. باش يكملو هاد المشروع ويكون واجد للخدمة، رصدو ليه 15 مليار سنتيم إضافية. هاد المركز غادي يساعد فالرفع من جودة الخدمات الصحية للناس اللي ساكنين فالمدينة والمناطق المجاورة.

أما المركز الاستشفائي الإقليمي فالفقيه بن صالح، راه قريب يسالي، بتكلفة 46 مليار سنتيم وسعة 250 سرير. هاد المشروع غادي يزيد يقوي العرض الصحي فالجهة ويخلي الناس ما يمشيوش بعيد باش يلقاو العلاجات الضرورية.

هاد المشاريع الثلاثة مجموعين غادي يديرو فرق كبير فالقطاع الصحي فالجهة، ويعطيو للساكنة فرصة الاستفادة من خدمات طبية متقدمة وقريبة من ديورهم.