سعيد بوناصر – كود //
نطقات هيئة الحكم فغرفة الجنايات ديال محكمة الاستئناف فالحسيمة، فقضية “المهدي المنتظر” اللي روع ساكنة الإقليم عام 2021، وأمرات بالحكم عليه بلإعدام.
الحكم ضد هاد ال”سيريال كيلر” اللي صفاها ل3 أشخاص فجماعة “أيت قمرة” وروع ساكنة باقي جماعات الإقليم عام 2021، جا باش يسد الضوصي ديال أشهر مجرم داز فمدينة الحسيمة.
الواقعة لي عاشتها مدينة الحسيمة وتحديدا جماعة “أيت قمرة” كترجع لعام 2021 فاش تلقاو 3 ديال الجثث تقتلو بطريقة بشعة على يد هاد المجرم، فضرف 5 أيام، ورماهم فأماكن متفرقة.
من بعد ما كمل الجرائم ديالو فسنة 2021، بداو الجوندارم فالبحث ديالهم والتحري باش يوصل للقاتل، اللي فاش طاحو عليه، قاومهم بعنف، قبل ما يتقدم للوكيل العام، واعتارف قدامو بكل تفاصيل الجرائم ديالو ببرودة دم، بحيث أكد فإطار التحقيق اللي تفتح معاه أنه سافر من آسفي للحسيمة “باش يقضي على الفساد فالمدينة”، حسب تعبيرو.
