گود سبور//

نايض النحل على الفرنسي كيليان مبابي لاعب ريال مدريد الإسباني، حيث استغل وقت الراحة اللي عطاه له الطاقم الطبي بسبب الاصابة اللي عندو ومشى سافر مع صاحبتو يدبل الجول فالطاليان، ودابا الرياليين كاعيين عليه لدرجة انهم ولاو باغيينو يمشيو بحالو وطلقو هاشتاغ عليه.

المحيط ديال كيليان مبابي باش يدافع عليه خرجو بيان لوكالة الأنباء الفرنسية نشراتو اليوم الثلاثاء، قالو فيه: “جزء من الانتقادات كايستند على تأويل مبالغ فيه لعناصر مرتبطة بفترة تعاف مضبوطة بشكل صارم من طرف النادي، وما كاتعكسش واقع التزام كيليان والخدمة اللي كايدير يويميا على لقبل لگروب”.

محبين ريال مدريد كايشوفو ان كيليان مبابي ما احترمش الفرقة، وانه الطاقم الطبي لريال مدريد عطاوه الراحة باش يبرا من الاصابة اللي عندو، ماشي يمشي يسافر مع راسو وصحابو اللعابا كايلعبو ماتشات مهمين.