گود سبور- فيلادلفيا//
كاتعرف مدينة فيلادلفيا توافد الجمهور المغربي من المغرب ومن جميع أنحاء العالم، باش يشجعو الوداد الرياضي فكاس العالم للاندية.
https://www.facebook.com/share/v/1J9Skkgyux/?mibextid=wwXIfr
ولاعبين الوداد الرياضي، اليوم الاربعاء 18 يونيو 2025 اول ماتش لهم فمونديال الاندية، ضد مانشستر سيتي النگليزي، ومن المنتظر يعرف هذا الماتش حضور مهم للجمهور المغربي والوداديين باش يشجعو الفريق الأحمر.
وحسب مصادر جورنال “گود” فالمشجعين ديال الوداد الرياضي اللي جايين الماتش اليوم الاربعاء لفيلاديلفيا، مقدرين بكثر من 20 ألف مشجعة ومشجع ودادي قطعو التذاكر ديالهم باش يدخلو ليتران لينكولن، وبالمقابل فعدد المشجعين ديال مانشستر سيتي عددهم ما فايتش 5000 حتى 6000 مشجعة ومشجع.
الوداديين هنا فالميريكان محيحين بزاف، ومن بعد المشجعين والمكتب ديال الوداد الرياضي اللي كرمو عمدة فيلادلفيا وسط مدينتها على حسن ضيافتها للواك، فإلترا وينرز حيحيو مزيان البارح الثلاثاء فتايمز سكوير فنيويورك، ودارو كورطيج واعر غناو وزهاو فيه مزيان وكان حدث زروين كايبين الشعبية الكبيرة اللي عند الوداد الرياضي خارج المغرب.
وللإشارة فعمدة فيلادلفيا شيريل بارك، أعلنت ان يوم 8 ماي اللي هو ذكرى تأسيس الوداد الرياضي، غايولي يوم وذكرى سنوية بالنسبة لسكان فيلادلفيا لتخليد ذكرى الوداد فمدينتهم.
