كود سبور//

طالبت جماهير الوداد الرياضي، بالمحاكمة العادلة للرئيس الأسبق للنادي سعيد الناصيري، اللي متابع فقضية ما يعرف بـ “إسكوبار الصحرا”.

وطلقت جماهير الوداد الرياضي حملة على مواقع التوصل الاجتماعي للمطالبة بمحاكمة عادلة لسعيد الناصيري، وهذا الشي بعدما جبد عدد من الوثائق قدام المحكمة وآخرها خلال جلسة الجمعة 9 ماي 2025، واللي نفى بعا الادعاءات ديال الحاج احمد بنبراهيم الملقب بالمالي والمغنية لطيفة رأفت والبرلماني عبد الواحد شوقي، اللي بدات كاتبان التصريحات ديالهم اللي قالوها قدام الفرقة الوطنية ان فيها تناقض، بالاضافة إلى الانتفاض ديالو امام المحكمة ملي سمع تصريح ديال المالي كايقول فيه ان “سعيد الناصيري كان مكلف بالعلاقات العامة واللوجستيك فشبكة للتهريب الدولي للمخدرات”.

ونفى سعيد الناصيري هذا الشي واكد ان المالي كان بهاد الكلام كايمس مؤسسات الدولة من جيش ودرك وأمن وغيرها من المؤسسات الشريفة اللي معروفة بالكفاءة والنزاهة ديالها، وان الهدف ديالو ماشي سعيد الناصيري وإنما المس بالنظام، وهذا الشي بالإضافة لأنه هضر على السياق اللي عرف فيه المالي وقال انه عرفو كشخص مقرب من رئيس دولة مالي وكدبلوماسي وكان كايستقبلو مع سفير مالي، ففترة كان فيها المغرب والملك محمد السادس متوجهين للاستثمار فالقارة الأفريقية، وانه ما كانش عارفو بلي كايتاجر فالمخدرات وقال سعيد الناصيري انه ما كايتعاملش مع تجار المخدرات.

گاع هذا الشي خلى فئة من جمهور الوداد الرئاسي تطلق حملة على مواقع التواصل الاجتماعي بهاشتاگ “المحاكمة_العادلة_لسعيد_الناصيري”، وكايشوفو انه كاين تناقض وان الرئيس السابق د الحمرا عليه مؤامرة.