كود سبور//

عكس داكشي اللي كانت باغياه إدارة الوداد الرياضي من المنصة الإلكترونية الجديدة للنادي لبيع تذاكر ماتشات الفريق، بطريقة سهلة وسلسلة، فالجمهور ديال الواك لاقيين مشكل فهاد البلاتفورم فأول استعمال لها تحت اسم الوداد.

وحسب شهادات توصل بها “كود” من عدد د الجماهير الودادية، اللي دخلت للبلاتفورم ديال تذاكر الوداد، باش يشريو تيكي ماتش الواك ضد إنييميا، وصبرو على الوقت ديال الانتظار فلاباج باش قدرت تدخل للمنصة، وبعدما اختارو نوع التذكرة ودخلو المعلومات ديالهم البنكية باش يخلصو كاين اللي مادازتش له لوبيراسيو.

والأكثر من هذا كاينة مجموعة دازت لها العملية وخلصت وتوصلت بإشعار من تطبيق البنك ديالها أن ثمن التذكرة تقطع، ولكن ملي دخلت البلاتفورم باش تيليشارجي الروسي ديال التذكرة اللي تقدر تسحب به التيكي من الكيشي، كيعطيها“satut paiement en cours” .

هذا الشي خالف توتر داخل جماهير الوداد الرياضي، خصوصا وأن ادارة النادي كانت النية ديالها أنها تسهل عليهم ياخدو التذاكر ديالهم وبسلاسة، ولكن كيبان أن هاد البلاتفورم اللي تم الاختيار ديالها ما مسلكاش، مع العلم أن كاين فالوداديين اللي فايت خدم بها حيث كانت كتستخدمها شركة “كازا إيفنت” بدلو غير اللوكو وحطو ديال الوداد.