كود ـ سبور//

السبت اللي فات، جمهور الوداد تفاجأ بقرار السلطات المحلية، اللي كيترأسها العامل، باش يمنعوه من الحضور فالماتش ديال فريقهم ضد حسنية أكادير. هاد القرار خلق استياء كبير وسط الجماهير، حيث كانو كيتسناو الفرصة باش يساندو الفريق ديالهم فماتش مهم فالبطولة.

ولكن المفاجأة الكبيرة كانت اليوم، ملي نفس السلطات سمحات للجماهير تحضر فالماتش ديال الوداد ضد شباب السوالم نهار الثلاثاء في دوري التميز، اللي هو ماتش أقل أهمية من ديال السبت. هاد التناقض فالقرارات خلا الجمهور يستغرب، وطرح تساؤلات كثيرة علاش تمنعو نهار السبت وتسمح ليهم غير بعد أيام.

جمهور الوداد فمواقع التواصل الاجتماعي كيطالب بتوضيحات من وزير الداخلية عبد الوافي لفتيت بما انه المسؤول على العمال والولاة على هاد القرارات المتناقضة حيث سبق وقع نفس الشيء في الخميسات فلقاء التوارگة والواك، وهاد الاستياء زاد بعدما كان الوزير نفسه نفا قبل اشهر عبر “گود” أنه كيتدخل فالشؤون الداخلية ديال الوداد، خصوصا بعدما خرجات إشاعات كاتقول بلي الوزير كان معارض أن هشام أيت منا يترأس الفريق.

الجماهير كيشوفو أن هاد التناقض فالقرارات خلا الجمهور شاك بزاف فأكثر من جهة خاصة وأن الادارة العامة للأمن الوطني ما عندها مسؤولية فهاد المنع المتكرر وبقات الداخلية فموضع الاتهام، وكيطالبو بتوضيح رسمي باش يتوضح الأمور ويحبسو الشائعات اللي كاتقول بلي كاين تدخلات سياسية فقرارات المنع أو السماح ليهم بالحضور.

الجمهور مستمر فالمطالبة بتوضيحات واضحة وشفافة على هادشي كامل، وكيأكدو على حقهم فالحضور فالمدرجات وتشجيع الفريق ديالهم فكل المسابقات، بلا مايتفرقو بين ماتش مهم ولا لا، والمغرب مقبل على تنظيم تظاهرات عالمية وبوطولتو ملعوبة بدون جمهور إلا في ماتشات قلال.