كود سبور//

عبر جمهور المغرب الفاسي على الاحتجاج ديالو بسبب عدم اختيار الفريق للمشاركة في البطولة العربية، اللي كتحمل النسخة الجديدة منها اسم ملك السعودي سلمان بن عبد العزيز.

واختارت جماهير المغرب الفاسي ماتش فريقها ضد فريق الدفاع الحسني الجديدي اللي بادي دابا، من أجل الاحتجاج وبقوة رفع ميساج تكلموا فيه حتى تذاكر المونديال اللي التحقيق فيهم خدام لمعرفة شكون المسؤول على هاديك الفضيحة اللي كانت فقط، وكذلك عبروا على عدم رضاهم باستبعاد الماص من المشاركة فالبطولة العربية، وقال جمهور المغرب الفاسي ميساج قاصح: “في دهاليز الجامعة ذهب تحقيق تذاكر المونديال إلى طي النسيان، وفي اروقتها ضاع حق الماص في كأس الملك سلمان”.

ومازال جمهور المغرب الفاسي ما استوعبش الاستبعاد ديال الفريق من المشاركة فكأس الملك سلمان، اللي تم اختيار ثلاث أندية لتمثيل المغرب فيها وهي الرجاء الرياضي حامل لقب البطولة والوداد الرياضي بطل المغرب والجيش الملكي صاحب المركز الثالث الموسم الماضي، أما المغرب الفاسي اللي احتل المركز الرابع ما غيشاركش.

وكيشوفو جماهير المغرب الفاسي بلي فريقهم تظلم حيث قانون الجامعة كينص على مشاركة كل فريق فمسابقة خارجية وحدة فقط، وبالمقابل غيكون فريق الجيش الملكي مشارك في 2 ديال المسابقات هي كأس الكونفدرالية الإفريقية وكأس الملك سلمان اللي غيلعب فيها الفريق العسكري الدور الأول الأيام المقبلة، أمام الرجاء والوداد فغيلعبو ليكروب واللي غيكونوا فالصيف بالرياض السعودية بعد نهاية الموسم.