كود- مدريد //

فـمدريد ،عطا مجلس المدينة جائزة” كلارا كامبوامور“ لجمعية إيرانية لحقوق الإنسان فـإسبانيا،رئيسة الجمعية”فريبا إحسان“قالت باللي غتهدي هاد الجائزة لگاع العيالات الإيرانيات لي تحداو المنع والقوانين المفروضة عليهم، خصوصاً لي حيدو الحجاب كنوع من الاحتجاج وطالبو بالحرية والكرامة.

إحسان أكدات فالكلمة ديالها باللي العيالات فإيران عمرهم ما سكتو على الظلم، وديما كان عندهم دور كبير فالثقافة والنضال ونشر الوعي ، وقالت باللي الحركة المعروفة بشعار “المرأة، الحياة، الحرية” ولات رمز ديال المقاومة فوجه القمع لي كيتعرض ليه الشعب الإيراني.

وذكّرات حتى بالاحتجاجات الكبيرة لي وقعات من بعد موت ”مهسا اميني“ ف 2022 ملي تشدات بسبب رفضها الحجاب ،هاد الحادثة دارت مظاهرات كبيرة فإيران، والسلطات ردّات عليها بالإعتقالات والتعذيب وحتى أحكام بالإعدام فبعض الحالات.

وفالأخير عبّرات رئيسة الجمعية على القلق الكبير بخصوص وضع الناشطة الإيرانية “نرجس محمدي” لي خدات جائزة نوبل للسلام لعام 2023، ولي مازال محبوسة و ما كاين حتى أخبار على صْحتها ولا وضعها فالحبس ، خصوصاً مع الظروف الصعيبة لي عايشاها البلاد بسبب الحرب.