سعيد الشاوي كود //

هادوك الجميعيات اللي كايدّعيو انهم كايدافعو على الصحافة الرياضية، (مازال) دايرين الفوضى وما باغيينش ينخارطو فالورش اللي طلقاتو الجامعة الملكية المغربية لكرة القدم، والعصبة الوطني لكرة القدم الاحترافية مع الجمعية الوطنية للاعلام والناشرين، لتنظيم عمل الصحافيين إلى الملاعب الوطنية.

وفبلاصة ما ينخارطو هذا الجمعيات اللي كايدعيو انهم كايدافعو على الصحافيين الرياضيين، فهذا المشروع ديال تنظيم دخول الصحافيين الرياضيين للتيرانات، ناضو تجمعو جايين لتيران العربي الزاولي فالدار البيضاء اليوم الجمعة فماتش الدريبي بين الرجاء والوداد، بلا موجب شرع وباغيين يديرو الفوضى باش يدخلو للملعب وجايبين معهم شي وحدين ما عندهم علاقة بالصحافة.

وما بغاوش هادو ينخارطو فالتنظيم ديال بطائق الملاعب اللي من شروط الحصول عليها التوفر على بطاقة المجلس الوطني للصحافة، وهذا الشغب اللي كايديروه هو حيث تقطعت عليهم البزولة اللي كانوا كايحلبو منها لمصالحهم الشخصبة من سفريات خارج المغرب وغيرها، قبل تنظيم الدخول للتيران من طرف الجمعية الوطنية للاعلام والناشرين اللي دارت حد للعشوائية فالعمل الصحافي داخل الملاعب.

كيفاش جمعيات تدعي الدفاع على رسالة الصحافة النبيلة ما دارت حتى احتجاج باش كانو صحافيين مهنيين معاها كينعسو فالمراكز الاعلامية فقطر. فين كانو باش كانت جمعيات كيتزنز فالاعتمادات. حتى بيان صغير ما خرجوهش.

دابا باش داخلين الا الصحافيين المهنيين اللي عندهم بطاقة الصحافة ديال المجلس الوطني للصحافة٬ جاو يحتجو. مزيان يحتجو ولكن باش يطورو القطاع ماشي باش يرجعوه كيف كان. هادوك اللي جاو كانو ديما كيشوفو باللي منصة الصحافة معمرينها غرباء على القطاع وديما سارطين لسانهم. هادو باغيين الفوضى ماشي الاصلاح