سعيد بوناصر – كود //

نظم وفد حقوقي صحراوي، مرفوقين برؤساء جمعيات من مختلف المدن المغربية، وقفة تضامنية البارح الخميس، مع مول متحف تاريخي كيتواجد فجماعة “بني شيكَر” الساحلية التابعة لإقليم الناظور، صدر ضدو حكم بالإفراغ، وهادي المرة الثانية اللي كيتعذر فيها تنفيذ هاد الحكم القضائي.

متحف “البستان” هو ديال واحد السيد سميتو “عبد السلام أمغار”، ولد قبيلة “بني شيكَر”، وكيقول ل”كَود” بللي هو خدم فهاد المتحف أكثر من 40 عام وهو كيجمع بياسة بياسة، حتى وصل لهادشي اللي عليه المتحف اليوم، وفاللخر جا واحد السهث اللي ماعندوش معاه حتى نزاع بغا يهرسلو كلشي، حسب قوله.

وحسب تصريحات لأعضاء من الوفد الصحراوي ل”كَود”، قالو بللي زيارتهم للناظور، ماشي هي اللولة، بحيث سبق ليهم جاو قبل ووقفو مع “عبد السلام أمغار” فالمرة اللولة اللي كان غيتم فيها تنفيذ حكم الإفراغ، الأمر اللي ماتقبلوهش هما كولاد الصحراء المغربية، حيث غيعدم وغيطمس هوية ومرجع تاريخي ديال قبيلة “بني شيكَر” والريف كلو، وبالنسبة ليهم.

وزادو أكدو بلي المجهود اللي دارو مول المتحف باش يجمع كَاع هاد القطع لمدة 40 عام، كان فالأصل يستحق تكريم ودعم خاص، ويتم تشجيع المشروع ديالو اللي ولى قبلة لكَاع زوار الإقليم، اللي كايجيو من المدن المغربية المختلفة وأيضا ولاد الجالية المقيمة بأوروبا زائد السياح الأجانب، اللي ولات عندهم بلاصة محبوبة خاص يزوروها فمدينة الناظور.

الوفد الصحراوي أكد بللي قيمة المتحف اليوم، ماكتنقصش قيمة على ديال معبر الحياة “الكَركَرات”، اللي كيربط المغرب بكَاع الدول الإفريقية الشقيقة، بحيث هاد المتحف كيشكل رابط كبير بين تاريخ الريف والأجيال المقبلة اللي غيلقاو أمور ثمينة ومهمة يمكن ماغتبقاش مستقبلا، حسبهم.