كود سبور//

بحالهم بحال كاع المغاربة، عبرت جماهير الرجاء الرياضي على إدانتها للأحداث الدامية اللي كتوقع حاليا بين الفلسطنيين والإسرائليين، واختارو ماتش الخضرا مع المغرب التطواني اللي بادي اليوم الاحد ضمن منافسات البطولة الاحترافية باش يعبرو على هذا الشي.

الرجاويين تسناو حتى وصلت الدقيقة 7 من ماتش الرجاء وتطوان، وناضو يغنيو الأغنية المشهورة ديالهم “رجاوي فلسطيني”، وهزو أعلام فلسطين فإشارة ليوم السبت 7 أكتوبر 2023، اللي هجمات فيه حركة حماس الفلسطينية على إسرائيل، وطبعا كلشي عارف شنو وقع من بعد وهذه الأحداث اللي طيحت ضحايا من الجانبين الإسرائيلي والفلسطيني، ومازال مستمرة وحتى حد ما عارف باش غتسالي.