أميمة عطية – كود كازا ///
كتواجه الأغلبية المسيرة لجماعة الدار البيضاء بوادر خلافات داخلية بدات كتبان بين مكوناتها الثلاثة، اللي كيجمعو التجمع الوطني للأحرار والأصالة والمعاصرة والاستقلال، بعدما طلع التوتر خلال أشغال الجلسة السابقة من دورة أكتوبر، فواحد المرحلة اللي كتواجه فيها العاصمة الاقتصادية تحديات كبيرة مرتبطة بتدبير المدينة وتسريع المشاريع التنموية وتحسين الخدمات العمومية.
وحسب معلومات توصلات بها “كود”، تحركات عمدة الدار البيضاء، نبيلة الرميلي، فمحاولة لاحتواء هاد الخلافات والحيلولة دون تطورها، بحيث راسلات مكونات الأغلبية المسيرة فخطوة الهدف منها تهدئة الأجواء والحفاظ على تماسك التحالف وضمان استمرار أشغال المجلس الجماعي بلا عراقيل.
وحسب ما أكد مصدر لـ“كود”، فالتوتر اللي بان خلال الجلسة السابقة رجع كيطرح أسئلة على مستقبل التحالف الثلاثي، خصوصا بعدما تحولات بعض النقاشات داخل المجلس لكلاشات وتدخلات حادة بين المنتخبين، وسط استحضار نتائج الانتخابات التشريعية الأخيرة والتوازنات السياسية اللي تبدلات من بعدها.
وكتجي هاد التطورات فمرحلة كتحتاج فيها جماعة الدار البيضاء تنسيق بين مكونات الأغلبية لتدبير عدد من الملفات اللي كتهم الحياة اليومية ديال السكان، من البنية التحتية والطرق والأزقة، للنظافة والنقل الحضري والتجهيزات الأساسية، فضلا على تسريع المشاريع وتحسين جودة الخدمات العمومية.
وفهاد السياق، كيبقى التحدي المطروح هو قدرة مكونات الأغلبية على تجاوز الخلافات وتدبير الاختلافات داخل المجلس، باش ما يتحولش الاحتقان السياسي لعائق قدام الملفات المطروحة، خصوصا أن الدار البيضاء مقبلة على رهانات مرتبطة بالاستعدادات لكأس العالم 2030، اللي غادي ينظمو المغرب وإسبانيا والبرتغال.