وكالات//

هزّات جريمة خطيرة مدينة ساو باولو،  بعد ما دار راجل واحد الفعلة بشعة: دهس واحد الشابة وسحلها لأكثر من كيلومتر فواحد لوطوروت، ومن بعد هرب وحاول يخبّي الطوموبيل ديالو باش ما يتشدّش.
وانتشرو تصاور وفيديوهات ديال الحادث فالسوشل ميديا، وهادشي زاد صدمة عند الرأي العام.
وبينما مواقع برازيلية قالت بلّي الجريمة ممكن تكون عندها علاقة بالغيرة أو علاقة سابقة بين الجاني والضحية، المتهم دوغلاس ألفيش دا سيلفا، اللي عندو 26 عام، نفى أي معرفة بيها وقال فالتّحقيق بلّي “ما كيعرفهاش نهائياً”.

ولكن البوليس قالت بلّي هو المشتبه الرئيسي فمحاولة قتل الشابة تاينارا سوزا سانتوس (31 عام)، من بعد ما دهسها وجرها فطريق “مارجينال تيتي” بلا ما يوقف.
فالتطورات ديال القضية، وثائق البوليس لي شافتهم قناة “سي إن إن البرازيل” بيّنو بلّي المتهم حاول يخترع “قصة كاذبة” باش يهرب من المسؤولية، بحيث تصل بعائلتو مباشرة من بعد ما خلا الضحية، وتلقّى نصيحة قانونية باش يخبّي الطوموبيل.
وبالفعل، مشى خبّا الطوموبيل الكحلة من نوع “غولف” فدار والد طليقتو فواحد لحيّ فـ إيتايم باوليستا بلا ما يشرح ليه علاش.
وزيد عليها، البوليس شدّوه فواحد لوطيل فـ “فيلا برودنتي”، وكان بغى يقاوم الاعتقال وضرب واحد البوليسي وحاول يشدّ منو السلاح.
اضطرّ واحد المحقق يطلق رصاصة جات فذراعو قبل ما يسيطرو عليه، ومن بعد نقّلوه لمستشفى “فيلا ألبينا” ومن بعد للوحدة ديال مكافحة الجريمة المنظمة.