كود -الراشيدية//

هاد الأيام وقعو جوج الجرائم خطيرة فإقليم الرشيدية خلّعات بزاف ديال الناس المهتمين بالبيئة والحيوانات البرية، القضية اللولى كانت ذبح 6 جراو ديال الذياب من طرف ثلاثة رحل، واللي تنشرات فمواقع التواصل الاجتماعي ، الشي لي خلق موجة غضب كبيرة، حيث بزاف ديال الناس شافو فهاذ التصرف اعتداء على التوازن البيئي، وطالبو بفتح تحقيق وتطبيق القانون قبل مايفتح الدرك فحقهم محضر رسمي بعد اعتقالهم.

ومن جهة أخرى كشف الناشط البيئي موحى  فحسابو على الفايسبوك سرقة جراو ديال ثعلب الفنك من واحد الغار نواحي مرزوكة، هاد الحيوان لي  معروف بأنه محمي وقليل، وكيعيش فالمناطق الصحراوية، وعندو دور مهم فالتوازن الطبيعي ديال هاد المناطق، الناشط بيئي اللي كان حاضر فالمنطقة هو اللي كشف الواقعة، وقال بلي مشى حتى لعين المكان ولقى الغار مخرب وخاوي، وبيّن بلي اللي دار هاد الفعل استعمل “كواد” باش يوصل للغار ويسرق جراو كيف ما صور حتى الاثار ديال الروايض على الرملة .
https://www.facebook.com/share/v/18DT26Gfut/

هاد الحوادث بزوج خلات الناشطين البيئيين يطلبو من  السلطات، سواء الدرك أو المياه والغابات، باش يتم معاقبة المتورطين، كيف ما رجعو النقاش على موضوع حماية الحيوانات البرية فالمغرب، خصوصاً فالمناطق الصحراوية اللي كتعاني من قلة المراقبة ، وخا  القوانين كتحمي هاد الأنواع وكتمنع الصيد ديالها أو الاتجار فيها، ولكن المشكل فالتطبيق ديالها حيث كيبان بلي ما كاينش ردع كافي .