كود -الفارو دسبتة//

حسب صحيفة إل فارو دي سبتة، السلطات المغربية رفضات، نهار الأربعاء، دخول جثة شاب مغربي توفى فسبتة، بعدما كانت سيارة نقل الموتى دخلات للمعبر الحدودي ديال تاراخال باش تنقل الجثة للمغرب.

الشاب سميتو محمد سعيد، عندو 21 عام، وكان أول جتة مرتبطة بمأساة تاراخال اللي قدر يتحدد بشكل رسمي من طرف الحرس المدني الإسباني، الشي اللي خلا الإجراءات الضرورية دار باش يتم ترحيلو للمغرب ويتدفن تما.

وحسب المصدر نفسو، سيارة نقل الموتى دازت الحدود من بعد الوحدة ونص ديال العشية، ولكن من بعد تم منع دخول الجتة للمغرب، وخا أن الإجراءات اللازمة للنقل كانت كاملة مصادق عليها حسب الجريدة.

وبسبب هاد القرار، بقات سيارة نقل الموتى وسط المنطقة الحدودية قبل ما  ترجع لسبتة من جديد.

وكان محمد سعيد من بين اللي توفاو فالحادث المأساوي اللي وقع فالبراج البحري ديال تاراخال فآخر يوليوز، واللي خلا عدد كبير من الضحايا ،وحسب المعطيات اللي نشرها المصدر الإسباني، مازال ظروف نقل جثمانو للمغرب باش يدفن وسط عائلتو ما تحسماتش.