كود سبور//

عكس ما تم الترويج له خلال الساعات الماضية بواحد التصريح كتدعي وسائل الإعلام اللي تناقلاتو أنه ديال الدولي المغربي سفيان أمرابط، قال فيه بلي غيبقى فيورنتينا، فالنجم المغربي موافق أنه يمشي لمانشستر يونايتد الإنجليزي اللي كيهندس فالصفقة.

وحسب الإعلامي الإيطالي فابريسيو رومانو المتخصص فانتقالات اللاعبين والمدربين بأوروبا وصفقات الفرق الأوروبية، فسفيان أمرابط ما قالش “أنه غيبقى ففيورنتينا”.

وكشف فابريسيو رومانو على فيسبوك فين وصلت الصفقة وقال: “سفيان أمرابط قبل أنه يمشي لمانشستر يونايتد وباغي ينتقل له في انتظار المفاوضات بين الفريقين”.

وزاد نفس المصدر وضح وقال: “سفيان أمرابط عطى الضو الأخضر لتن هاك مدرب مانشستر يونايتد، وخا العروض د الفلوس الكثيرة اللي جاتو من السعودية”.

وأكد الإعلامي الإيطالي: “مازال مانشستر يونايتد ما قدمش عرض رسمي لفيورنتينا على قبل أمرابط، ولكن كيوجد فيه، وأن الثنائي فريد وفان دي بيك غيمشيو من المان، باش يولي سفيان أمرابط أولوية للفريق الانجليزي والمدرب ديالو تين هاك”.