كود – الرباط//

وسط الجدل الكبير اللي داير حول الدعم العمومي المخصص لاستيراد الأبقار والمواشي، واللي بدات فيه المعارضة مبادرة باش تدير لجنة تقصي الحقائق، خرجات الأغلبية البرلمانية وردات بسرعة وطلبات تنظم مهمة استطلاعية للوقوف على كواليس هاد العملية.

وثيقة رسمية حصلات عليها “كود”، كتكشف أن ثلاث فرق برلمانية من الأغلبية (التجمع الوطني للأحرار، الأصالة والمعاصرة، الاستقلال) وطبعا كاين معهم الفريق الدستوري لي معندوش مقعد فالحكومة، وجهات مراسلة رسمية لرئيس لجنة القطاعات الإنتاجية، كتطلب فيها تنظيم مهمة استطلاعية باش تشوف الإجراءات المتخذة فهاد المجال، وكيفاش كتمشي عمليات الاستيراد ديال الأبقار واللحوم، واش فعلاً كتحمي القدرة الشرائية ديال المواطنين ولا كاينين شبهات اختلالات معينة.

هاد الخطوة كتشكل رد مباشر على التحركات اللي دارتها المعارضة مؤخرا، اللي كتسعى لتشكيل لجنة تقصي الحقائق فهاد الملف الحساس، خصوصاً بعدما خرجات تقارير وشكايات كتشير لاحتمال وجود تلاعبات فالدعم والتوزيع.

مصدر برلماني قال ل”كود” أن الأغلبية “باغية تدير استباق رقابي قبل ما يخرج الملف من يدها ويتحول لملف سياسي بامتياز”، خصوصاً وأن لجنة تقصي الحقائق عندها صلاحيات واسعة وقد تكشف معطيات محرجة.

هاد الصراع الجديد بين الأغلبية والمعارضة فهاد الملف، كيعكس ارتفاع منسوب التوتر فمجلس النواب، مع اقتراب مناقشة مشاريع حساسة مرتبطة بالمالية والدعم والقدرة الشرائية.

السؤال اللي باقي مطروح: واش المهمة الاستطلاعية غادي تكون فعلا كآلية للرقابة الجدية، ولا مجرد محاولة لوقف تشكيل لجنة تقصي الحقائق؟.