كود – كازا //

منظمة “Ancestral Whispers”، عاودات صورات الوجه ديال المرأة لي عاشت قبل 6400 عام ولي تلقات مدفونة فالصخيرات، وهاد الشي عطى معلومات جديدة على الأصول الجينية والثقافية ديال سكان شمال إفريقيا.

المنظمة المتخصصة فإعادة بناء الوجوه كتخدم بعلم الآثار الحيوية، وقدرات ترجع ملامح هاد المرأة اللي عاشت فالمغرب، وبالضبط فـمنطقة روازي الصخيرات، الجمجمة ديالها، اللي سماوها SKH001، كانت هي الأساس ديال هاد العملية.

التحليل بيّن أن طول هاد المرأة كان تقريباً 1.58 متر، ومن ناحية الأصول، كانت عندها خليط، من جهة أصل شمال إفريقي ومن جهة شرق أوسطي، ( لبنان وسوريا )، وحتى شعب النطوفيين اللي عاشو فالعصور القديمة، وزيد على هاد الشي، كاين تأثير إيبيروموروسي، اللي هو عنصر معروف فشمال إفريقيا، وهاد الشي كيبين أن عندها جذور محلية قوية.

https://twitter.com/i/status/2041471128233799733

فطريقة الدفن، كانت المرأة ممدودة على ظهرها، مايلة شوية لليمن، وراسها محني لقدّام و يديها كانوا مجموعين وسط جسمها، ورجليها مثنيين بزاف، يمكن حيت الحفرة كانت صغيرة.

القبر ديالها كان فيه على الأقل 4 ديال الماعن ديال الطين ، واحد منهم بقا صحيح ، أما لخرين تهرسو عاد دفنو حداها، هاد الشي كيدل على أن طقوس الدفن كانت مقصودة وعندها معنى.

موقع الصخيرات-الروازي، اللي تكتاشف عام 1980، كيتعتبر واحد من أهم مواقع الدفن اللي كيرجعو للعصر الحجري الحديث الأوسط فشمال المغرب، فين تلقاو تقريباً مية قبر. هاد الاكتشافات كتعطينا فهم أدق للبنية الاجتماعية والثقافية ديال أول المجتمعات اللي استقرت فالمنطقة.