عمر المزين – كود///

وصلات البارح السبت جثة المخرج والسيناريست المغربي محمد عهد بنسودة لمدينة فاس جاية من فرنسا، اللي مات فيها عن عمر 56 عام، بعد مسار فني طويل عطا فيه بزاف للسينما والتلفزة المغربية.

وغير ما وصل الجثمان، بدات فيلا الكندري بطريق إيموزار كتستقبل عدد من الممثلين والفنانين المغاربة، بالإضافة للأصدقاء والعائلة، اللي جاو يودّعو الراحل ويحضروا لمراسيم الجنازة ديالو، فواحد الأجواء كلها حزن وتأثر.

وصلاة الجنازة تصلاّت ظهر اليوم فمسجد الرضا القريب من الفيلا، بحضور وجوه فنية معروفة ومحبّي الفقيد، اللي أجمعو كاملين على أن بنسودة كان إنسان طيب ومهني كبير وخلا بصمة واضحة فالمشهد الفني الوطني.

وفاة المخرج خلّفات صدمة كبيرة فوسط الفنانين والإعلاميين، حيت كان معروف بخدمتو الجادة وبالأعمال اللي قدّم واللي لقات متابعة واحترام من عند الجمهور المغربي.

وغادي يتم دفن الراحل بمقبرة باب الفتوح بفاس، وسط حضور العائلة والمقربين والزملاء، فوداع أخير لواحد من الأسماء اللي غادي تبقى محفورة فذاكرة الفن المغربي.