كود سعيد الشاوي برشيد ////

عابد بادل هادا برلماني فمجلس المستشارين عن حزب التجمع الوطني للاحرار من برشيد. خوتو مشاو من لحمامة قبل ايام وركبو التراكتور. كيشغل هاد رجل لهمايز مقرر فلجنة المالية بمجلس المستشارين. بهاد الصفة كيعرف كلشي اللي جاي. يعني ماشي غير تضارب المصالح راه جريمة استغلال معلومات سرية لمصالح شخصية.

عادل بادل هو اللي كينطابق عليه كلمة “فراقشي”. وغاديين نشرحو الاسباب. قبل اش كتعني فراقشي؟ لفراقشي راه ماشي اللي كيجيب لحوالا. فالثقافة الشعبية لفراقشي شفار كيخاون لبهايم من بكر وحوالا وماعز ووو. كيخون وصافي. هادا هو لفراقشي.

بعد فضايح استيراد لحوالا والبكر لتعويض الخصاص فالسوق المغربية هاد المصطلح تطلق على هادوك اللي كيستوردو هاد الحيوانات من الخاريج. بدا استعمال المصطلح نزار بركة الامين العام لحزب الاستقلال ووزير التجهيز والنقل والماء واللوجيستيك. طبعا استعلمو لاهداف سياسية وخربق المعنى ديالو. بغى يهاجم الحكومة خاصة وزير الفلاحة اللي طلق هاد المشروع محمد صديقي قبل ما يمشي فحالو وبغى يهاجم الاحرار لانها قايدة الحكومة.

لفراقشي ديال بصاح ماشي اللي كيخدم فالقطاع وهادي مهنتو هادي سنوات. كاينين اسماء معروفة فالمغرب حياتها كلها باستيراد لبكر ولغنم وووبالاضافة كتربيهم. هادو استفادتو من فضيحة 500 درهم على كل حولي استوردوه ولكن هادو استغلو الهمزة وفشل الوزير السابق باش يوقع مع كل مستورد دفتر تحملات واضح. ايلى جا الحولي ب2000 درهم والدولة عطاتك 500 درهم ما يمكنش يفوت ثمنو 2300 درهم حقاش كانت اعفاءات ضريبية اي من حق كل واحد يربح 300 درهم فقط لا غير فالحولي. هاد لشي ما كانش ووقعات فضايح

دابا نرجعو لسي عادل بادل. هادا ما عمرو فحياتو كان مستثمر فالقطاع الفلاحي وبشكل اخص لحوالا. ما عندو علاقة بالدومين. حسب مصادر “كود” باش جات الهوتة ديال لحوالا وكان عارف باللي كل حولي غادي ياخذ عليه 500 درهم من الدولة زائد الارباح باش يبيعو فالداخل، ناض تلاح. حسب مصادر “كود” خذا غير من الدعم 30 مليون درهم. اييه. 30 مليون درهم وزيد عليها شي 20 مليون درهم رباح باش باعهم فالداخل. يعني الدولة عطات لواحد ما عمرو خدم فهاد القطاع ديال لحوالا او لبكر 30 مليون درهم.

هادا هو لفراقشي وتنطابق عليه هاد الكلمة. طبعا خاص هاد الملف يتفتح. محمد صديقي وزير الفلاحة السابق عندو مسؤولية سياسية. ولكن حتى اللي استغلو هاد لوجيبة امثال عادل بادل خاصهم يخلصو.

هاد لفراقشي راه مستثمر مع مهدي بنسعيد وبلخياط فديك الطونوبيلة البرويطة “نيو” اللي نقلوها من توانسة واللي حتى هما ناقلينها من الشينوا. اييه بادل هو المستثمر الثالث فالمشروع مع صاحبو وعشيرو بنسعيد واللي كان سبابو باش جابو هو وعائلتو كلها وركبهم فوق التراكتور قبل الانتخابات التشريعية ل23 شتنبر للي جاي. تلقاو تفاصيل اكثر على دخولو لهاد المشروع فمقال على “لوديسك”