كود القاهرة //

المعلم اللي نوض روينة فمصر وتحول من منتحل صفة صحفي الى بوكسور، معلم معين بسلا. هاذ المعلم، وفق معطيات حصلت عليها “كود”، كيخدم فواحد المدرسة فمقاطعة العيايدة. هاذي ثلاث سنوات كان عندو تفرغ دبر عليه من الجامعة الحرة الذراع النقابي لحزب الاستقلال، بعدما كان من اتباع الكيحل.

اخطر ما في الموضوع ان المعلم، وفق مصدر “كود”، مشا لمصر خلا امتحانات السادس ابتدائي وهرب من الحراسة والتصحيح. المديرية ديال سلا مكيتعاتقو مع تا واحد الحراسة والتصحيح. كيفاش زهق ليهم هذا.
دارت الايام و حيدو ليه التفرغ ودار فيه سبيرة مرضاش يخدم فالابتدائي وعطاوه استاذ ديال التربية البدنية بعد تدخل النقابة عاوتني وفق مصدر “كود”.

هاذي سنتين اضطر يخدم بواحد المؤسسة ولكن داير خدمة ديال خاطر و كيتبورد على أي مدير خدم معاه و داسر بشي صحابو فمديرية وزارة التربية الوطنية فسلا تشرح مصادر “كود”.

السؤال دابا واش مشا لمصر برخصة المديرية الاقليمية لوزارة التربية الوطنية و لا مشا بلا خبار الادارة. يلا مشا برخصة راه مشكلة كبيرة حيث كاين شي واحدين دارو شواهد طبية مرضية و سخسخوهم واخا عندهم مرض مزمن.

هاذ هونا عاجبو راسو بزاف، وغي كيتلاوح على عباد الله، نهار حضر بالصدفة عشاء على شرف الابطال المشاركين فجائزة الحسن الثاني للغولف نقز على الامير مولاي رشيد وتصور معاه باش يبان راه واصل. راه الصحافي كيمشي يغطي الانشطة ماشي يدير صور تذكارية هاذ الشي بزاف على لهبال وزيرو معانا لخوت ديال التعليم وخليكم بعزكم يكفيكم شرفا مهنة التدريس.

المتأمل لهذه القضية كيكتشف أن من يشجع بعض منتحلي مهنة الصحافة هم كبار المسؤولين الاداريين من مدير الاكاديمية ديال الرباط الى نائب الوزارة بسلا وقبلهم الوزير الوصي على القطاع.