كود –  بني ملال //

عرف جبل مودج بإقليم بني ملال اليوم ,وضعية صعيبة بعدما وحلو  طوموبيلات وتسدّات الطريق الجبلية بسباب التلج، الشي اللي خلّى عدد من المواطنين حاصلين وسط الثلج مع طموبيلاتهم  كتر من ثلاث ساعات، فظروف  قاصحة وبرودة صعيبة .

وحسب معطيات ، المواطنين اللي وحلو فالطريق دارو نداءات استغاثة للسلطات المحلية، وطالبو بتدخل عاجل باش يتم فتح الطريق وإنقاذ الناس، خصوصاً مع استمرار تساقط الثلوج وصعوبة التنقل فالمنطقة.

السلطات الإقليمية ببني ملال تفاعلات  مع هاد النداءات، مني وصلات كاسحات الثلوج لبلاصة الحادث وبدات ففتح الطريق وكتسرح حركة السير، وتعاون الناس العالقين.

هاد التدخل خلّى ارتياح كبير وسط الناس اللي كانو حاصلين، واللي عبّرو على الشكر ديالهم للسلطات على الاستجابة السريعة، وأكدو باللي كلشي بخير وما تسجلات حتى إصابات.