گود سبور//
سالات الدورة الأولى من فعاليات الدورة التكوينية الخاصة باللاعبين كافB، واللي سهرت عليها الجامعة الملكية المغربية لكرة القدم من خلال الإدارة التقنية الوطنية والاتحاد الإفريقي للعبة، وعبروا اللاعبين على الفرحة ديالهم حيث دارو هاد التكوين.
ومن بين المشاركين فهاد الدورة كان يحيى جبران كابيتان الوداد الرياضي، وقال فتصريح للموقع الرسمي ديال الجامعة الملكية المغربية لكرة القدم: “مشكورة الإدارة التقنية على هاد المبادرة والشكر للكاف على الدور ديالهم لتكوين لاعبين وجيل جديد من المدربين وهادي شي حاجة زوينة لنا كلاعبين وكنستافدو منها بشكل كبير وباش نقدرو حتى نبارطاجيو هاد الشي فالمستقبل مع شباب ومع الجيل القادم”.
سعيد النجم السابق للرجاء والوداد حتى هو استفاد من هاد الدورة التكوينية، وقال: “كنشكر الجامعة والإدارة التقنية والإطار الوطني فتحي جمال على هاد الالتفاتة وشرف ليا نكونو هنا مع اللاعبين اللي لعبو معيا باش داكشي اللي تعلمناه حنا نعطيوه للوليدات وهذا الشي غيعاونا فالمستقبل ديالنا”.