وكالات//

وقعات واحد الواقعة فمدينة السليمانية فالعراق، كتشبه شي فيلم خيالي، حيث طلعو من كرْش واحد الشاب عراقي 24 حاجة غريبة، ما بين ملاقيط شعر وابر!

المستشفى التعليمي ديال الجهاز الهضمي والكبد فالسليمانية قال بللي الفريق الطبي ديالو نجح يخرج 16 ملقط شعر، و8 إبر، وزوج ديال الغطاوات ديال الملاقيط، من معدة شاب عندو 29 عام.

الدكتور مصطفى عبد الرحمن، نائب مدير المستشفى، صرّح بللي الشاب جا كيشكي من وجع كبير فكرشو، ومن بعد ما دارو ليه الفحوصات، لقاو فمعدتو أدوات حادة ومعدنية!

قال الدكتور: “درنا ليه عملية بالمنظار عن طريق الفم، وتحت البنج العام، وفي أقل من ساعة قدرنا نخرجو كلشي”.

والمصادر الطبية قالت بللي الشاب كيعاني من اضطرابات نفسية، وهي اللي خلاتو يبلع هاد الأشياء الخطيرة.