گود سبور//

تفرگع فوزي جمال مدرب مولودية وجدة على البرمجة ديال العصبة الوطنية لكرة القدم الاحترافية، بعد خسارة الفريق مع الجيش الملكي بنتيجة 5 لزيرو الويكاند ضمن الدورة 19، وهذا الشي بسبب مواعيد الماتشات ديال البطولة اللي كيبرمجوها قريبة، وقالهم بلي ما لاعبينش الكورة داكشي علاش كيبرمجو جوج ماتشات لكل فريق فسيمانة وحدة.

وتحدث فوزي جمال بعد خسارة مولودية وجدة مع ليفار وقال فالندوة الصحافية: “بصراحة اللي كيدير البرمجة عمرو لعب الكورة، حيث لعب لكورة كان يفكر مزيان، راه لعبنا 4 الماتشات فمدة 15 يوم، وكاينين فرق مستفدين وفرق لا بحال مولودية وجدة وبركان وحسنية أكادير وهادو فرق اللي كيضربو بزاف الطراجي”.

وكمال مدرب مولودية وجدة: كيفاش أنا لعبت ماتش الجمعة ونديبلاصا الغد له نجي للرباط، وعاد السيمانة اللي فاتت كنت فالرباط، كن قالوها لنا كن گلسنا هنا نلعبو مع طنجة فقنيطرة، راه ضربنا 2000 km فسيمانة راه بزاف، حنا العائق الأول اللي عندنا هو ما درناش الانتدابات ونزيدو دابا هاد السفريات، بقاو هاكدا غايكملو البطولة الشهر الجاي والله ما عارف شكون كيدير البرمجة ما باغيينش نتاقدو ولكن يقلبو شويا، حيث كاينين ليشارج ديال التداريب وديال الماتشات وليشارج ديال ليفوياج، وكيفاش غنجيريو هادشي راه صعيب وأنا اللي مدرب عياني السفر”.