سامي العلوي -گود كازا //

كشفات مصادر خاصة ديال “گود” أن جامعة الحسن الأول بسطات غادي تعقد المجلس التأيدبي للبت فموضوع أساتذة “الجنس مقابل النقط”، نهار الخميس الجاي، للخروج بقرارات في حق ثلاثة ديال الأساتذة، وإرسال ملفاتهم إلى وزير التعليم العالي والبحث العلمي والابتكار عبد اللطيف الميراوي، باش يحيلها بدوره على عزيز أخنوش رئيس الحكومة،

المجلس لي غادي تترأسو عميدة كلية العلوم القانونية والسياسية بسطات حسنة كجي، وغيكونو فيه أستاذات وأساتذة من القانون الخاص والعام وممثلين ديال الإدارة.

ويأتي تحديد هاد الموعد فوقت ما زال واحد الحاجة ممفهوماش، وهي المتعلقة بحالة رئيس شعبة الاقتصاد والتدبير (خ.ص) لي خذا البراءة.. فالنسبة لحالة هاد الأستاذ خاص المجلس يكون حكيم ويرجعو لخدمتو مادام القضاء قال الكلمة ديالو ومكينش شي حاجة ليكدينو.

عبد اللطيف الميراوي وزير التعليم العالي والبحث العلمي والابتكار، على حساب ما جابت “گود” من مقربين منو، أكد على جمال الزاهي، رئيس جامعة الحسن الأول بسطات بالنيابة، باش يفرقو ما بين اشناهي البراءة واشناهو التقادم.

وهنا كتطرح حالة أخرى، وهي لأستاذ آخر لي كالو القضاة ابتدائيا واستئنافيا أن الدعوى العمومية ديالو سقطات للتقادم.. فبما أنه ما خذاش البراءة، فإن العقوبة الإدارية فحقو خصها تتخاذ وتكون مناسبة.

هاد الشي خصو يسالي.. فعاليات نقابية تتقول بأنه مبقاتش بلاصة لهاذ الأساتذة في الجامعة، خصوصا لعندهم التقادم ماشي البراءة وخص ياخذو الجزاء.