كود – وكالات//
كيف اليوم مات جاك دريدا (Jacques Derrida) لي هو واحد من أكبر وأشهر الفلاسفة في القرن العشرين.
إلى بغينا نفهمو علاش دريدا مهم بزاف، خاصنا نهضرو على المفهوم اللي اختارعو وتشهر بيه فالعالم كامل: التفكيكية (Deconstruction).
قبل من دريدا، كانت الفلسفة الغربية والمجتمعات ديما كتقسم العالم لثنائيات (بحال: أبيض/كحل، عقل/عاطفة، كلام/كتابة، داخل/خارج…)، وديما الثقافة كتعطي للطرف الأول قيمة حسن من الطرف الثاني.
دريدا جا وقال هاد التقسيم ماشي بريء وماشي طبيعي ،التفكيك عندو ماشي هو الهدم ، حيث كان بحال شي ميكانيك معلم كيشد الماكينة اللي هي النص، الفكرة، أو العادة المجتمعية، و يفككها طرف بطرف باش يبين لينا كيفاش ركبات، وفين كاينين التناقضات والعيوب ديالها،دريدا بين باللي حتى حاجة ما تابتة، وبلي المعنى ديما كيتبدل ومكاينش “معنى واحد مطلق”.
دريدا كيعلمنا انه مابقاش الكاتب أو صاحب السلطة هو “المقدس” اللي عندو الحقيقة المطلقة، دريدا كيعلمك تقرا”ما بين السطور” على الحوايج اللي النص أو الطقس ماباغيش يقولها أو كيحاول يخبيها.
كيف ما انتقد دريدا بقوة مركزية العقل الغربي (Eurocentrism). مني بين كيفاش الثقافة الأوروبية كانت كتعتبر راسها هي “المركز” اللي فيه الفهم، والآخرين (بحال إفريقيا أو الشرق) هما “الهامش”.
أما الأفكار ديالو دخلات بقوة لعلم الاجتماع، النقد الأدبي، الفن، القانون، وحتى العمارة ، اللي ولات كتبني بنايات بأشكال هندسية مائلة ومفككة ومتحررة من القواعد القديمة.
في لخر د حياتو، ركز بزاف على أفكار إنسانية، وكان كيدافع على “الضيافة المطلقة”و كيفاش نستقبلو المهاجرين والغرباء بلا شروط ،دريدا كات يقول باللي “العدالة” هي الحاجة الوحيدة اللي ميمكنش نفككوها، حيت هي أساس كلشي.