كود هناء ابو علي ///

سفيان البحري اللي كان منتاحل صفة وداير صفحة باسم الملك محمد السادس تحت الحراسة النظـرية. ماشي غير بوحدو معاه نادية الداودي بنت الوزير السابق والقيادي فالعدالة والتنمية. هاد المرة ماشي بسباب انتحال صفة. فمنتصف ليلة السبت الاحد كان بحري فمطعم بار طابيو فمحج الرياض فالرباط وفق مصدر ل”كود”.

ووفق مصدر “كود” كان هاد البحري خارج من المطعم ومفوت بزاف٬ تقدمات ليه بنت وقالت ليه راها من المعجبات بيه. اييه شوفو الوقاحة. هاد المعجبة كانت هي نادية الداودي بنت الوزير السابق والقيادي فالعدالة والتنمية.

سفيان البحري وفق مصدر “كود” دفعها وتصرف معاها برعونة. طبعا مع حتى هي كانت مفوتة٬ هزات قرعة الشراب وضرباتو لوجهو. شرملاتو وسال منو الدم٬ وفق مصدر “كود”.

طبعا طاح الدم خاص المخزن يحضر. هاد الشي اللي كان وجا البوليس وتخبرات النيابة العامة بعد ما داوهم للدائرة الامنية الثانية بالرباط٬ وفق مصدر “كود”.

دابا راهم تحت الحراسة النظرية وغاديين يقدموهم بعد ما يسالي وقت هاد الحراسة النظرية.