البام فشل فتنظيم لقاء حزبي فالعيون لعرض الوثيقة المذهبية ديالو بعد المقاطعة اللي دارت قواعدو
وكالات //
اليوم الجمعة، 8 أكتوبر، علنات الأكاديمية السويدية بللي الصحفية الفلبينية ماريا ريسا (Maria A. Ressa) ومعاها الصحفي الروسي دميتري موراتوڤ (Dmitry Andreyevich Muratov) ربحو جائزة نوبل للسلام 2021.
وجا هاد الاختيار بمنح الجائزة للصحفيين دميتري موراتوف من روسيا وماريا ريسا من الفلبين، هاد العام بفضل “جهودهم فـ حماية حرية التعبير، اللي هي شرط أساسي للديمقراطية والسلام الدائم”، حسب الأكاديمية السويدية المانحة لجوائز نوبل.
و ماريا ريسا (58 عام) هي صحفية وكاتبة فلبينية/ميريكانية، وهي المؤسسة المشاركة والرئيس التنفيذي لشركة “رابلر”، وخدمات كمراسلة استقصائية رئيسية في جنوب شرق آسيا مع شبكة “سي إن إن” الميريكانية لمدة 20 عام تقريبا. وفـ2020 تحكم عليها بتهمة “التشهير الإلكتروني”، حسب قانون “مكافحة الجرائم الإلكترونية” الفلبيني اللي نايض عليه الصداع، وهو الحكم اللي استنكراتو نقابات الصحفيين وجماعات حقوق الإنسان فالعالم وقالت بأنه اعتداء على حرية الصحافة.
و دميتري موراتوڤ (59 عام) هو صحفي روسي ورئيس تحرير جورنال “نوڤايا كَازيتا/Novaïa Gazeta” (الجريدة الجديدة)، اللي وصفاتها لجنة حماية الصحفيين بأنها “الجريدة الوحيدة اللي عندها استقلالية وقدرة حقيقية على الانتقاد فـ روسيا”. وهاد الجريدة مشهورة بتغطيتها لـ”ملفات سخونة”، بحال قضايا الفساد الحكومي وانتهاكات حقوق الإنسان.