كود الرباط//
ثورية ساركة صاحبة أشهر صورة في زلزال الحوز، ولي نشراتها صحيفة “ليبراسيون” بعنوان فيه تحامل كبير وتسييس لمعاناة الضحايا وذلك سياق الازمة الدبلوماسية بين باريس والرباط ، قالت لـ”كود” بلي كتعيش أيام مزرية وباقا مكرفصة هادي كثر من عام وشهر تقريبا.
واوضحت ثورية لـ”كود” :”أنا مكرفصة والله لي عالم بيا..مستفدتش من السكن وحتى الدعم ديال الكراء توقف ليا”، مضيفة :” استفدت 3 مرات هادي عام من دعم 2500 درهم شهريا، عطاوني 5000 درهم ف 26 شهر 12 ، و10 فشهر 1 عطاوني 50 ألف ريال..وهادي عام وشهر تقطع”.
وقالت ثورية لـ”كود” :” عام وشهر هادي متوصلت بالدعم درت شكايات كثيرة، وما خليت ما درت والو”.
وتابعت :”انا لي تعرفت فدوك ايام الزلزال فديك الجريدة..”.
وعبرت ثورية عن شكرها الكبير للفنانة المغربية منال بنشليخة للي تكلفت ليها بكراء بارطما مدة عام الزلزال.
وتحولت حياة ثورية إلى حجيم بعد سنة من زلزال الحوز، حيث تبخرت كل الوعود التي أعطيت لها.
ثورية قالت بلي اتصلوا بالمحامي الفرنسي غير باش يعرفو رقم الملف ضد جريدة ليبراسيون.
ثورية كتقول بلي حياتها مقهورة ولوزتها لي عاونتها باش تكري 600 درهم شهريا ف طريق اوريكا، وبلي كادور على طبالي باش تجمع الخبز والماكلة لولادها.
قصة ثورية واحدة من القصص ديال معاناة ضحايا زلزال الحوز، واللي كيعيشو فالجحيم خصوصا مع موجة البرد.
ثورية ضحية للزلزال من جهة وضحية للبروباغندا الاعلامية من جهة اخرى خصوصا بعدما نشرت عليها ليبراسيون صورة معبرة عن معاناتها.
يذكر أنه في يوم 11 شتنبر 2023، نشرت الجريدة اليومية الفرنسية “ليبراسيون” على صفحتها الأولى صورة لسيدة مغربية وهي في حالة صدمة نفسية بسبب انهيار منزلها.
وحملت الصفحة الأولى للجريدة العنوان التالي: “ساعدونا، نحن نموت في صمت”، وقد وردت هذه الجملة بين علامتي اقتباس، مما يوحي بأنها هي التي نطقت بها.
