أنس العمري -كود///

استيراد اللحوم الحمراء ما طيحش الأسعار فالأسواق. وهادشي وقفات عليه “كود” بجولة دارتها بعدد من الأحياء الشعبية، أمس السبت، فكازا، حيث لقات الأثمنة ما زال مستقرة في سقفها الأعلى، دون أن يطرأ عليها أي تغيير.

وهكذا، ورغم مرور أسابيع على وصول أولى شحنات اللحوم الحمراء المستوردة، لقات “كود”، البارح، فثمن الغنمي واصل لـ150 درهم وأكثر للكيلو، بينما ثمن البكري كيبدا من 120 درهم للكيلو وانت غادي طالع، حسب أسواق كل منطقة.

أما إلى بغيتي الكوطليط فراه واصل 170 درهم للكيلو والسطيك داير من 180 حتى 200 درهم للكيلو على حساب اختيارك.

وهاد التسعيرة كتهم الإنتاج الوطني، فيما اللحوم المستوردة لي رصدات “كود” عرضها في المتاجر الكبرى، فثمن الغنمي فايت 90 درهم للكيلو، في حين البكري قريب من هاد السعر.