الرئيسية > آراء > ثمن الإرسال والشحن ديال الكوليات في المغرب غالي بزاف والخدمات عيانة وخاصك تسنى ساعة أو كثر باش تسيفط أو تشد وهادشي راه قمة التخلف في زمن البيع والشرا في الأنترنيت وخدمات التوصيل خاص يدار شي حل ضروري
02/12/2020 16:00 آراء

ثمن الإرسال والشحن ديال الكوليات في المغرب غالي بزاف والخدمات عيانة وخاصك تسنى ساعة أو كثر باش تسيفط أو تشد وهادشي راه قمة التخلف في زمن البيع والشرا في الأنترنيت وخدمات التوصيل خاص يدار شي حل ضروري

ثمن الإرسال والشحن ديال الكوليات في المغرب غالي بزاف والخدمات عيانة وخاصك تسنى ساعة أو كثر باش تسيفط أو تشد وهادشي راه قمة التخلف في زمن البيع والشرا في الأنترنيت وخدمات التوصيل خاص يدار شي حل ضروري

محمد سقراط-كود///

مع كورونا تحرك هادشي ديال بنادم يتقدى من الانترنيت أي حاجة بداها من الخضرة والديسير ونتا غادي حتى للزطلة وحاجة خرى، حتى دوك لي كانو مكيتيقوش او كيبغيو حتى يشوفو الحاجة ويقلبوها ويعاودو ويفكرو مزيان ويمشيو يدورو السوق ويساومو حتى يلقاو الهوتة عاد يشريو حتى هوما ولاو كيتقداو من الأنترنيت، أنا نيت كبرت فالبيع والشرا والسواق كان عندي يقين تام أنك واخا كاع تشوف الحاجة وتقلبها راه ممكن تشمت ويقولبوك الشناقة، ولكن مع المدة وليت كنتيق في أنني نتقدى لعيبات من الأنترنيت، جوج مرات كنتقدى بيكالة من فايسبوك مرة من بركان ومرة من خنيفرة، كنشوف البيكالة كنعرف سميتها كندخل نقلب عليها في الأنترنيت ونقرى مراجعات الناس عليها، ونطلب من السيد يصورها فيديو ويعطيني التفاصيل ديالها، وكيسيفطها مع شركة لوكس بمية درهم حتى للدار كناخد البيكالة كنعطيهم الفلوس هوما كيوصلوهاليه، بلا مانخرج ندور ونقلب فالجوطيات والسواق وسير لهنا سير لهيه غير من الدار نقضي غاراض وهادشي راه كيديرو العالم سنوات هادي أنا راه دابا بحال رجل الكهف كتاشف الحضارة وبحالي بزاف في المغرب.

مؤخرا تقديت شي لعيبات من واحد الموقع فرنسي خاص بالبياس ديال البيكالات الثمن مناسب وكنلقى عندهم حاجات لي غاليين هنا في المغرب وشبه مكاينينش، كانت هادي تاني تجربة انني نتقدى من موقع أجنبي ولي خلاني مشكك هو ثمن الإرسال كان غير خمسة أورو من فرنسا لباب الدار، هاد الثمن جاني قليل مقارنة بثمن الإرسال داخل المغرب كتبغي تسيفط غير ورقة في أمانة خاصك تشد الصف كثر من ساعة على الأقل، وتخلص سبعة وربعين درهم لي هي ثمن أصغر كولية، ودازت ربعطاش ليوم وصلات الكولية من فرنسا حتى لباب الدار وغير بخمسين درهم، وهادشي راه من فرنسا دولة لي غالية أصلا، أما الشينوا وعلي أكسبريس هاديك هضرة خرى، أول مرة تقديت خديت بياسة بعشرين درهم دوزات عشرين يوم كانت هنا ضربات النص في العالم بعشرين درهم ثمن البياسة والشحن، هذا مستوى آخر منقدوش عليه.

ولكن للأسف في المغرب شحال من مرة كتبان شي بياسة في فايسبوك ماركت كنكون محتاجها ولكن ملي كنجي نشوف أن ثمن الإرسال ديالها هو نفس ثمنها كندير مناقص ونقدر نمشي نقلب عليها في مواقع الشينوا ونسيفط عليها وتوصل حتى لعندي بأقل من بشحال غادي تقام عليا ملي نشريها من عند شاب مكافح جايب بياسات يتمعش فيهم، بزاف ديال الشباب ولاد وبنات حاليا كيبيعو ويشريو في عبر الأنترنيت، ولكن ثمن الشحن والإرسال كيبقى عائق كبير قدام البائع وحتى المشتري، خاص الدولة تدخل ويتطلق اللعب شوية فهاد المجال وتدور الحركة وتحيد المعيقات ولي أهمها هو الشحن والإرسال سواء داخل المغرب أو للخارج، راه لا يعقل تجي كوليا من آخر الدنيا بجوج فرنك وتبغي تسيفطها هي نيت هنا خاص كمية درهم، هادشي مكيساعدش وحتى أمانة دايرين مقر واحد في بعض المدن لي كبار، وديما الزحام والمقاتلة والثمن مبالغ فيه بزاف وماشي حتى شي سرعة داكشي على قد الحال، وغير شحال ديال الوقت كيتسنى لي سيفط ولي غادي يشد راه نص نهار هاداك وحتى الشركات لي بانت منافسة راه نفس الموشكيل، خونا سيفط ليا بيكالة مع شركة لوكس وصلاتني خلصتها عندهم ولكن خاص يتسنى شهر عاد يشد الشيك بحال داكشي ديال القرون الوسطى ، عوض السيد يشد الفلوس في البلاصة ويحرك يدور بيهم الحركة لا خاصو يربع يديه شهر عاد يوصلوه آش هادشي.

موضوعات أخرى