كود -كازا  //

طلقات اللجنة الوطنية لمراقبة حماية المعطيات لى عندها  الطابع الشخصي CNDP ولجنة الحق فالحصول على المعلومات CDAI، اللي كيرأسهم عمر السغروشني، منصة «ثقتنا» ti9atouna.ma.

هاد المنصة جاية باش توعي وتحسس المواطنات والمواطنين بحقوقهم فحماية الحياة الخاصة، طبقا لمقتضيات القانون 09.08، وبالحق فالحصول على المعلومات اللي كرسو الفصل 27 من الدستور ونظمو القانون 31.13.

المنصة كتقرب المواطنات والمواطنين من الحقوق ديالهم فمجال حماية المعطيات ذات الطابع الشخصي، وكتشرح ليهم شنو هي الحوايج اللي خاصهم يردو ليها البال فالتعاملات اليومية.

ومن بين هاد الحقوق، كاين الحق فالإخبار ملي كتجمع شي جهة المعطيات الشخصية ديالهم. يعني خاص المواطن يكون عارف بلي المعطيات ديالو غادي تجمع، وعلاش غادي تستعمل، وكيفاش غادي يتم استعمالها.

وكتشرح المنصة حتى  كيفاش يقدر الشخص يطلب تصحيح المعطيات ديالو إلا كانت فيها شي معلومة غالطة، وكيفاش يطالب بحذفها نهائيا فالحالات اللي كيتيح فيها القانون هاد الشي.

وماشي غير الحقوق ديالنا اللي كتهم، ولكن حتى احترام معطيات الآخرين، يعني خاص كل واحد يرد البال قبل ما يبارطاجي  صور أو معلومات شخصية ديال شي شخص واحد آخر، خصوصا فمواقع التواصل الاجتماعي، وما يستعملش معطيات الآخر  بلا ترخيص.

وفحالة تعرض شي مواطن للتشهير أو الابتزاز أو للاستعمال غير المرخص للمعطيات الشخصية ديالو، المنصة كتوضح ليه كيفاش يتواصل مع اللجنة والطرق اللي يقدر يستعمل باش يبلغ على هاد الخروقات.

المنصة فيها مجموعة ديال التبويبات، من بينها الأخبار، الحوارات، و«تحت المجهر»، اللي كيتطرق لقضايا مرتبطة بحقوق الأشخاص المعنيين، يعني المواطنين والمواطنات اللي كتجمع شي جهة المعطيات الشخصية ديالهم، و الواجبات المؤسسة  أو السيد اللي كيجمعو هاد المعطيات.

ومن بين الأمور اللي كتشرحها المنصة حتى ، كيفاش يستعمل المواطن السجل الوطني اللي فيه العناوين وطرق التواصل مع المسؤولين عن معالجة المعطيات الشخصية.

هاد الشي كيخلي المواطن مثلا يقدر يعرف واش واحد المحل اللي دخل ليه وكيستعمل كاميرات المراقبة، كيحترم مقتضيات القانون 09.08، وواش عملية تصوير الناس كتتم وفق الشروط القانونية، وبإخبار مسبق واحترام القواعد اللي كتفرضها CNDP.

المنصة كتخصص حتى حيز للقانون 31.13 المتعلق بالحق فالحصول على المعلومات، واللي كتسهر على تطبيقو لجنة الحق فالحصول على المعلومات CDAI.

وكيعتبر الحق فالوصول للمعلومة العمومية مدخلا أساسي لتعزيز الشفافية والحكامة، وربط المسؤولية بالمحاسبة.

ب «ثقتنا»، يقدر المواطن يتعرف حتى على الكيفية اللي يقدر بها يطلب معلومة عمومية كاينة عند مؤسسة عمومية، أو عند مؤسسة خاصة مكلفة بمهام مرتبطة بالمرفق العام، بحال شركات الماء والكهرباء والنقل الحضري وغيرها.

والهدف من هاد المنصة التفاعلية هو تكون حلقة وصل بين المواطنات والمواطنين، باش تولي حماية المعطيات الشخصية ثقافة وسلوك يومي كيحرص عليه كل واحد، وباش تترسخ ختى ثقافة الوصول للمعلومة العمومية.