كود سبور//

حسم مانشستر يونايتد النگليزي فالحالة الصحية ديال الدولي المغربي نصير مزراوي، وتأكد ان اللاعب غايرجع يلعب وواجد من ماتش غدا السبت.

وأعلن الهولندي اريك تين هاگ مدرب مانشستر يونايتد النگليزي اليوم الجمعة فندوة صحافية قبل من ماتش الفريق ضد برينتفورد، أن الظهير الايمن المغربي نصير مزراوي واجد باش يلعب هذا الماتش اللي غايكون غدا السبت ضمن منافسات بطولة النگليز.

وكان نصير مزراوي دار عملية لتصحيح نبض القلب قبل ايام قليلة، وغاب على الجوج ماتش المنتخب الوطني المغربي يومي 11 و 15 من أكتوبر الجاري، وقالو مانشستر يونايتد أن اللاعب مريض بعدما خرج فالشوط الاول من ماتش أستون فيلا فبطولة النگليز، بينما وليد الركراكي قال انه هضر معهم وما عندوش شي حاجة خطيرة، ولكن حيدو من لاليست وعيط على الرجاوي يوسف بلعامري بلاصتو.