وكالات //

واحد التقرير جديد دار روينا بعدما كشف تفاصيل قضية رفعتها 4 ديال العائلات بريطانية ضد شركة “تيك توك” بسبب وفاة ولادهم فحوادث عندها علاقة بتحديات خطيرة على المنصة، وأبرزهم تحدي “الإغماء”.

حسب التقرير اللي نشرات “بي بي سي”، العائلات وجهات الاتهام للشركة بعدم بان “التعاطف”، وقالو أنهم باغين من هاد القضية يعرفو الحقيقة ويشوفو الشفافية.

العائلات كتشوف أن ولادهم توفاو بعد ما شاركو فواحد التحدي اللي كان كيتداول على تيك توك ف2022، والشركة كتعرف بأنها كتحظر المحتوى والتحديات الخطيرة على منصتها، وحجبت البحث على الفيديوهات والهاشتاغات اللي عندها علاقة بهاد التحدي اللي كيربطوه بوفاة ولادهم.

الدعوى القضائية اللي تم تقديمها ف ميريكان نهار الخميس كتقول بأن إسحاق كينيڤان (13 عام) وأرتشي باترسبي (12 عام) وجوليان “جولز” سوييني (14 عام) ومايا وولش (13 عام) ماتو وهوم كيحاولو يديرو “تحدي الإغماء”.

الشكوى قدمات للمحكمة العليا ديال ولاية ديلاوير من طرف مركز قانون ضحايا وسائل التواصل الاجتماعي فميريكان نيابة على والدة أرتشي، هولي دانس، ووالدة إسحاق، ليزا كينيڤان، ووالدة جولز، إلين روم، ووالد مايا، ليام وولش.