كود سبور//

عبر أسامة تيرغالين على الفرحة ديالو بالرباح اللي حقق المنتخب الوطني المغربي الأولمبي على الأرجنتين فأول جولة من دور مجموعات أولمبياد باريس، وأكد أنهم يستاهلوه وقال أنهم كايلعبو ماتش بماتش حتى آخر نهار لهم فالمسابقة.

وتكلم أسامة تيرغالين فتصريح للموقع الرسمي ديال المنتخب الوطني المغربي بعدما ربحو الأرجنتين بنتيجة 2 لواحد وقال: “الماتش ضد الأرجنتين داز صعيب، كيفما كايعرف كلشي الماتش الأول كايكون صعيب وكان قدامنا خصم كبير، وخدمنا السيمانا كاملة مجموعين ودرنا داكشي اللي علينا وأكثر وما رجعناش خايبين”.

وكمل أسامة تيرغالين: “حنا ما كنزربوش وغانلعبو ماتش بماتش.. دابا خدينا 3 النقاط وغانرتاحو فهاد اليومين باش نكونو واجدين للماتش ضد أوكرانيا، ونقدمو نفس المستوى وأكثر ونصلحو الأخطاء ديالنا، ونبقاو نلعبو ماتش بماتش حتى آخر نهار فالألعاب الأولمبية”.