كود سبور//

خاص المسؤولين فمدينة برشيد ينوضو يصلحو التيران البلدي ديال المدينة، المرشح لاحتضان ماتشات ديال استحقاقات قارية مهمة تابعة للاتحاد الأفريقي لكرة القدم.

لجنة من الاتحاد الإفريقي لكرة القدم، دارت زيارة السبت اللي فات للتيران وتفقدت المرافق ديالو، وكان حاضر رئيس الشركة الرياضية ديال يوسفية برشيد نور الدين البيضي، وتفقدت اللجنة المرافق ديال التيران.

وهذا الشي كايجي بعد فضيحة طبلة قاعة الندوات ديال الملعب البلدي فبرشيد اللي صورتها كاميرا “گود”، خلال الندوة الصحافية ديال المدربين بعد ماتش شباب السوالم اللي استقبلو الرجاء الرياضي الجمعة الماضي فهاد التيران ضمن منافسات بطولة القسم الأول، ومن ورا زيارة اللجنة اللي كانت السبت، وقعت فضيحة جديدة البارح الاحد بالليل ملي تقطع الضو فالتيران واللاعبين ديال يوسفية برشيد ورجاء بني ملال كايديرو التسخينات.

هذا العبث اللي مازال كاتعيش فيه شي ملاعب فالمغرب خاصو يوقف عند حدو، والمسؤول إما يكون قد المسؤولية أو يحط السوارت ويخلي الناس اللي عندهم الكفاءات، حيث بحال هاد الهفوات ما بقاتش مقبولة في مغرب 2024، خصوصا وأن المملكة المغربية مقبلة على احتضان تظاهرات رياضية كبيرة بحال كأس إفريقيا 2025، ومونديال 2030، وبحال هاد الحوادث كاتمس بصورة المغرب.